وكسرت ايديا يا عنيا

تحديث : النتيجة ظهرت الحمد لله وجبت جيد جدا


طبعا انا ابيت ان ينتهي العام القديم ويبدأ العام الجديد إلا لما اكون عامل حاجة مميزة وبالفعل عملت حاجة مميزة جدا بس مؤلمة جدا ... انا اعلنها صريحة من موقعي هذا اني قد كسرت ايديا يا رجالة

انها حقا تجربة فريدة من نوعها منصحش اي حد انه يجربها وربنا يعافيكوا يارب ويحرسكوا قادر يا كريم ...آمين

تفاصيل التجربة بدأت في مساء يوم الثلاثاء الغابر لما كنت بألعب الساحرة المستديرة وكنت واقف حارس مرمى ولأني بحب اعمل كل حاجة باتقان وتفاني اتشاطت عليا كورة عادية جدا وبريئة جدا بس تقريبا سرعتها قاربت 150 كيلو متر في الساعة او على حسب كلام هيئة الارصاد الجوية كانت بمثابة صاروخ ارض ارض ولأني مكلف بحراسة اغلى حاجة في الساحرة المستديرة حطيت ايدي بس قدام الكورة ( آه والله يعني حتى محاولتش اصدها ) والحمد لله مدخلتش جوووووون وصحيح اتغلبنا الماتش بس اتغلبنا بكرامة وعزيمة ونفسية زملائي كانت في الارض تعاطفا معايا طبعا

المهم بعد ما حطيت ايدي قدام القذيفة مدرتش بنفسي يا اخواني الا وانا على الارض وطبعا بما اننا كلنا شباب في كلية طب وتقريبا بيفهموا في الطب كانت اول نصيحة ليا " مسبتهاش تدخل الجون ليه؟!!! " ، " قوم حط عليها مية ساقعة " ، " ابقى خلي الكورة تنفعك "

قلتلهم روحوني لماما انا عايز ماما وبالفعل روحوني لماما وعملت آشعة وجبستها لاني اكتشفت انها مكسورة وظهر الحق وخفق (زهق ) الباطل لأنهم اجمعوا انها مجزوعة وانا الوحيد اللي قلت انها مكسورة

نعم اخواني ... انها الفدائية في العمل ... انه التصميم والارادة ... وهيجي واحد يقلي طيب مسبتهاش تدخل ليه هرد عليه ببساطة واقله لأني مصري وابن مصري كان لازم افديها حتى اخر عظمة من عظام جسدي ( طبعا ده كله كلام هجس انا لو اعرف اني هتكسر كنت انا بنفسي دخلتها جون في نفسي ) بس قدر الله وما شاء فعل

اما عن الصعيد النفسي العميق فأنا باحمد ربنا وعارف اني احسن من ناس كتير الحمد لله وعرفت قيمة الدراع وقيمة كل حاجة ربنا خلقها ويارب يديمها علينا نعمة

اما عن الجبس فحدث ولا حرج :-
1- وزنه تقيل جدا خاصة في التنفس وحاسس ان كمان 3 ايام هميل بزاوية 30 درجة ناحية الشمال
2- عايز اهرش في دراعي ومش عارف وهموت واهرش بجد
3- هو شكله شيك الصراحة بس مؤلم قوي
4- بيخلي الواحد معاق من الآخر يعني

N.B:- انا كتبت البوست ده بإيد واحدة في حوالي نص ساعة ( حلو؟ )
N.B:- امانة الدعاء لاخوانا في غزة لان خلاص الواحد زهق من كتر الكلام
N.B:- اللي يعرف طريقة اهرش بيها ياريت يقلي لو سمحت

سلااام

في انتظار النتيجة

مخلصيييين بقالنا اكتر من شهر والنتيجة لسة مطلعتش يا جدعااااان !!!!

وطبعا قاعدين مستنين الفرج من عند ربنا وكعادة الشعب المصري اللي اتعود يفتي في كل حاجة ميعرفهاش كترت الاشاعات وكل ما المدة تزيد الاشاعات تزيد لغاية ما بقى في كل يوم اشعة جديدة ووصل اجمالي الاشاعات حوالي 75 اشعة وطبعا في ناس بتصدق وفي ناس مش بتصدق وانا كسرا لحالة الملل اللي انا فيها بقيت بصدقها شوية واكدبها شوية لغاية ما نشوف آخرتها

مش دي المشكلة - المشكلة اللي غايظاني بجد ان المفروض النتيجة دي يبقى ليها معاد محدد تظهر فيه زي اي شئ منظم بيتعمل في العالم ويبقى في جدول لكل حاجة يعني مثلا امتى هنبدأ ، امتى هنمتحن ، امتى هناخد الاجازة ، امتى النتيجة هتظهر - لكن مش كل حاجة بتتحدد حسب الحالة المعنوية والنفسية للقائمين عليها ونفاجأ مثلا ان الدراسة اتأجلت او ان الامتحانات بقت بدري شوية

ما علينا اانا مش عايز اطول انا قلت بس اشرحلكم حالتي يمكن اصعب عليكم وتدعولي وادينا مستنيين النتيجة والواحد هادي جدا وسيريلاكس ومش حاسس بأي قلق والحياة easy وكله تمام والاجازة ممتعة جدا ومفيش اي ملل خالص والاسعار رخيصة والجو ربيعي معتدل والهوا نضيف والمياه نقية ومش بتجيب امراض بتاتا .... هه دنياااااااااا

وادينا منتظرين .... تظهر براحتها

ادعولي - إهئ إهئ إهئ

N.B : معلش البوست كله اسود علشان يتماشى مع الحالة المبهجة اللي انا باعيشها

سلااام

فينك يا ماما

الموضوع باختصار ان بابا وماما الحمد لله ربنا انعم عليهم انهم يطلعوا يحجوا السنة دي وده شئ جميل جدا وربنا يتقبل منهم يا رب ويتقبل دعواتهم وخصوصا دعواتهم ليا

لكن الشئ اللي مش جميل خالص ان ماما بعدت عني وبابا كمان بس العواقب الوخيمة في بعد ماما اكثر بكتير من عواقب بعد بابا

اول عاقبة هي الجوووووع وبالرغم من ان ولاد الحلال كتير من اعمامي وعماتي وجيراني وكان كل يوم شتى انواع الاكل ما لذ منه وما طاب وبالرغم من اننا كل يوم كنا بناكل فراخ ولحمة ( الاتنين مع بعض ) وبالرغم من اني كنت بانزل اجيبه وادلق نصه وانا جاي بس برضه حاسس علطول اني جعان واكل ماما واحشني جدا وطبعا بما ان اختي اول مرة تدخل المطبخ وان احنا بالنسبة ليها مكناش اكتر من كوننا فئران تجارب بيضاء فطبعا كانت بتيجي ايام ناكل فيها حاجات غريبة زي مثلا فاصوليا مقرقشة وارز محروق وفراخ نية وحاجات كتير مش عايز افتكرها

ثاني عاقبة هي الغسيل وطبعا بما ان اختي مشغولة في التجارب المطبخية فمكنتش فاضية للغسيل خالص وكانت بتشغل الغسالة مرة واحدة في الاسبوع وطبعا منقدرش نتكلم والا مش هيكون في غسيل ولا طبيخ ( ان وجد اصلا ) ولا غسيل صحون ولا نشر غسيل ولا مسح ولا كنس فطبعا كنا بنقبل الامر الواقع وانزل اشتري لبس جديد وخلاص

ثالث عاقبة هي ان الاولاد مبيسمعوش الكلام وصعبين قوي في تربيتهم ومش قادرين يستوعبوا ان انا اخوهم الكبير

بس على الصعيد الآخر كان في ميزة وحيدة بس وهي المصرووووف وانا بما اني الكبير فكان المصروف في قبضتي ودي حاجة كانت عجباني جدا جدا وحاسس ان مفتاح الامر في ايدي وكنت باتبع سياسة الحصار ساعات وطبعا انا عارف اني هتبهدل لما بابا يرجع لأني كنت بخيل ( بس مش قوي والله ) بس كان لازم اعمل كده علشان اقدر اسيطر على الوضع والا كنا هنعمل الجزء الثاني من فيلم ( افواه وارانب ) بس الحمد لله الوضع المالي مستقر لغاية دلوقتي

ويارب يرجعلنا بابا وماما بالسلامة ويتقبل منهم ومن كل اللي بيحجوا واي حد عايز دعوة يكتبهالي ويسيب معاها 3.5 جنيه علشان انا بدور على مصادر دخل للخزينة

تحياتي

الاجازة في عز الدراسة

بجد بجد المدونة والمدونين والمدونات وعالم التدوين ككل واحشني جدا جدا وفعلا انا اكتشفت ان المدونة دي مؤثرة جدا جدا والحمد لله انا خلصت سنة خامسة طب في يوم الاثنين الموافق 11\11\2008 ( عيد ميلادي الجديد ) وفعلا الواحد حس انه اتولد من جديد بغض النظر عن البهدلة اللي اتبهدلناها كلها في امتحان الباطنة واللي كان المفروض يتحل في 5 ساعات برأي أئمة الدكاترة وكان الوقت 3 ساعات بس وبغض النظر برضه عن شدة الاعصاب المميتة اللي كنا فيها ولكنها .... الاجازة فيهون في سبيلها كل صعب وفداها شدة الاعصاب وسواها

وخدنا الاجازة وكفاية بجد انك تنام وانت مش شايل هم حاجة اللهم الا النتيجة طبعا بس ربنا يسهل الواحد عمل اللي عليه والباقي على ربنا وصحيح في حالة من الملل ومش لاقي حاجة اعملها بس فرحان ان انا في اجازة

واحب اشكركم كلكم لأن دعواتكم ساهمت بشكل فعال في المحنة دي وكانت بتظهر في حل الامتحان خاصة السؤال الاول الفقرة B ، والسؤال الثالث الفقرة A وربنا كان بيفتح علينا وبنحلهم صحيح الحل كان بيطلع غلط بس مسبناش الورقة فاضية ودي اهم حاجة

وكل سنة وانتم طيبين طبعا بمناسبة العيد وان شاء الله هحاول استعيد لياقتي وارجع اكتب واتابع من جديد

سلااام

قال طب قال

1\9\2007 -----> فقرة ( 1 )
عمو : السلام عليكم
انا : وعليكم السلام يا عمو
عمو : اذيك يا محمد
انا : الحمد لله
عمو : انت في سنة كام دوقتي
انا : لسة بادئ سنة خامسة يا عمو... ادعيلي
عمو : ربنا يعينك ويوفقك شد حيلك بقى واديني بابا
انا : حاضر يا عمو
8\3\2008 -------> فقرة ( 2 )
نفس العمو : السلام عليكم
انا : وعليكم السلام يا عمو
نفس العمو : اذيك يا محمد
انا : الحمد لله
نفس العمو : عامل ايه في الدراسة
انا : الحمد لله اديها ماشية
نفس العمو : خلاص هانت اهو شد حيلك اديني بابا
انا : حاضر
2\9\ 2008 -------> فقرة ( 3 )
نفس العمو : السلام عليكم
انا : وعليكم السلام يا عمو
نفس العمو : اذيك يا محمد
انا : الحمد لله
نفس العمو : عامل ايه في الاجازة ؟
انا : اجازة ايه يا عمو انا لسة في سنة خامسة
نفس العمو : معلش يا محمد متزعلش نفسك تعوضها السنة الجاية ان شاء الله
انا : اعوض ايه يا عمو !! انا لسة في سنة خامسة مش سقطت
نفس العمو : طيب شد حيلك وربنا يوفقك يابني اديني بابا
انا : حاضر
22\10\2008 -------> فقرة ( 4 )
نفس العمو : السلام عليكم
انا : وعليكم السلام يا عمو
نفس العمو : اذيك يا محمد
انا : الحمد لله
نفس العمو : استعديت للسنة الجديدة ؟
انا : سنة جديدة !!! انا بمتحن دلوقتي امتحانات سنة خامسة يا عمو
نفس العمو : لا حول ولا قوة الا بالله - لا حول ولا قوة الا بالله
انا : مش عايز بابا يا عمو ؟
نفس العمو : لا اله الا الله - لا اله الا الله ( عمو قفل السكة في وشي )
انا : على فكرة المفروض انا اللي اتجنن يا عمو مش انت

طبعا فقرة ( 4 ) دي من تأليفي بس لو كان اتصل اكيد ده كان هيكون حاله

- عارفين يعني ايه يعدي عليك 2 رمضان وانت لسة في نفس السنة
- حاسين لما يعدي عليك 3 اعياد ( 2 صغير وواحد كبير ) وانت لسة في نفس السنة
- مدركين يعني ايه تشم ريحة شياط كل ما تيجي تعد تذاكر ( ريحة مخي وهو بيسيح طبعا )
- متخيلين يعني ايه الواحد يخاف يحلق شعره ( اللي اقصر شعراية فيه طولها 5 سم ) علشان خايف المعلومات تطير مع الشعر اللي هيطير
- متوقعين ايه اللي ممكن يحصل لواحد زيي عنده ازدهاق داخلي ( زهقان يعني ) ؟
- فاهمين يعني ايه اخواتك يبدأوا سنة ويخلصوها ويبدأوا سنة جديدة وانت لسة في نفس السنة

ربنا معانا ونسألكم الدعاء واهي برضه حاجة تسند البذرة اللي هتسند النواية اللي هتسند الزيييير

إهئ إهئ إهئ إهئ

سلااام

آآآآه يا دبدوبي

انا باعتذر بشدة والله اني غبت الفترة اللي فاتت دي بس ده بسبب المذاكرة اللي اصلا انا معدش ليا نفس ليها خالص وجبت جاز بجد فاضل شهر وابقى كملت 12 شهر في السنة دي ( سنة خبيثة زي ما قلتلكوا ) وباعتذر برضه لأني مردتش على التعليقات بتاعة البوست اللي فات وباعتذر لأني مش بادخل على المدونات المجاورة وبكده يكون عدد الاعتذارات = 3 وياريت تسامحوني

وليا رجاء انكم تدعولي وتدعوا لكل اللي زيي ان السنة دي تخلص على خير لأن خلاص زي ما بيقولوا فات الكتيييييييييييير ما بقاش الا القليل

امبارح كانت اولى تجاربي مع قانون المرور الجديد والحمد لله انا منفذه بحذافيره وكنت ماشي في امان الله في وسط البلد عادي جدا كأي مواطن شريف بيعيش حياته اليومية وإذ فجأة لقيت كمين مرور قدامي وانا طبعا ولا اتهزيت ولا اتخضيت ... انا عادي جدا في السليم خالص والرخص تمام والمثلث موجود والحزام مربوط المهم لقيت 2 لواءات زي القمر جايين عليا واحد من على اليمين وواحد من على الشمال ودار حديث بيني وبين اللواء اللي على الشمال ( اللي ناحيتي يعني )

اللواء : شيل اللي على المراية ( انا والله سمعتها شيل المراية )

انا ( ببراءة شديدة جدا ) : اشيل المرايا اليمين ولا المرايا الشمال ؟

اللواء ( بصلي وضحك ) : انا بقلك شيل اللي على المرايا

انا ( بابتسم ابتسامة هبلة كده ) : المرايات مش عليها حاجة حضرتك

اللواء : انا قصدي المراية اللي في النص شيل من عليها الدبدوب اللي انت حاطه ده

انا ( فطسان على نفسي من الضحك بيني وبين نفسي طبعا ) : حاضر يا فندم حضرتك تؤمر ولو عايزني اشيلها كلها اشيلهالك

اللواء : يالا اركن على جنب وشيلها براحتك علشان انت معطل المرور

انا ( بيني وبين نفسي ) : انا برضه اللي معطل المرور يا ولاد ........

انا بصراحة مكنتش ناوي اكتب اي بوست جديد لغاية ما اخلص امتحانات بس بجد انا مقدرتش امسك نفسي وقلت لازم احكي وافضفض يعني حتى ما هنش عليه يبعتلي امين شرطة ولا حتى عسكري ... لا سيادة اللواء جاي بنفسه وهازز طوله علشان يقلي شيل الدبدوب (ههههههههه ) امال لو شاف الفيل اللي كنت شايله في الشنطة كان هيعمل ايه ؟!!

طيب حد بقى يجبلي مادة في القانون تحرم وتجرم الدباديب في العربيات علشان انا دمي محروق واللي غاظني اكتر انه مطلبش يشوف الرخص يعني هو موقفني مخصوص علشان الدبدوب والله لو كان قالي انا عايز الدبدوب كنت هديهوله لكن مش يقلي شيله كده ... ايه الحقد ده ؟!!

وعلى رأي النجم : كل واحد يخلي باله من دباديبه

وان شاء الله هحاول مش اتأخر عليكوا تاني ودعواتكم

سلااام

عبور الطريق

طبعا كل واحد فينا اكيد مرة من المرات عدى الطريق ( يعني من رصيف لرصيف ان وجد يعني ) وطبعا المفروض ان كل اللي بيعدي الطريق يبقى عارف ازاي يعدي الطريق بسهولة ويسر وامان ومن الامور اللي لازم الواحد ياخد باله منها او الامور اللي المفروض مكتوبة على الورق وبناخدها في المدرسة او اللي بابا وماما بيقلولنا عليها واحنا صغيرين :

1- يبص يمين وشمال وفوق وتحت قبل ما يعدي ( يعني يعمل تمرينات الرقبة )
2- يعدي الطريق من اقصر الطرق ومن الاماكن المخصصة لعبور المشاة ( خطوط طولية بيضاء بينها مسافات سوداء زي الشرايط كده )
3- يحاول يجري وهو بيعدي علشان يقصر فترة تعرضه للحوادث
4- طبعا مش عايز اقلكم انه يعدي لما الاشارة بتاعة العربيات تبقى حمرا ويقف لما الاشارة تبقى خضرا
5- يقف عى الرصيف وميعديش الا لما الطريق يفضى خالص

طبعا ده اللي المفروض يحصل ونشوفه في شوارعنا بس للأسف مش بنشوف الحاجات دي الا في بلاد الفرنجة لأن هما عندهم اشارات للعربيات وللمشاة وعندهم خطوط بيضا كتير وعندهم رصيف واسع جدا وعندهم وعي ثقافي اجتماعي وبيخافوا على نفسهم

الوضع عندنا بقى :

1- اي شخص في اي مكان في اي وقت يعدي الشارع علطول دون الاهتمام للاشارة او حتى النظر اليها
2- الشعب الوحيد اللي على الكرة الارضية اللي بيعدي الطريق بالطول ( يعني بدل ما يمشي 3 متر بين اقرب نقطتين يمشي 75 متر في وسط العربيات علشان يوصل للمكان اللي هو عايزه )
3- المصري هو الوحيد اللي يشوحلك بإيديه وهو بيعدي ويقلك اصبر وممكن مش يعبرك اصلا ويديك ضهره وممكن يشتمك كمان حتى لو بعيد عنك
4- المصري هو الوحيد اللي بيعدي الطريق من وسط العربيات ويعمل حركات بهلوانية ( تفطس من الضحك )علشان يوصل الناحية التانية
5- المصرية هي الوحيدة اللي على وجه البسيطة اللي بتعدي ولا كأنها في عرض ازياء ( مبدأ يا ارض اتهدي ما عليكي قدي )
6- عمرك ما تقف لواحدة علشان تعدي الطريق ( جنتلة يعني ) ويهون عليها تقلك شكرا او حتى ميرسي او حتى تبتسملك
7- المصري هو الوحيد اللي بيسيب الرصيف ( ان وجد ) ويمشي في الشارع ( قال يعني شجاع ومش خايف من العربيات )

انا بقى كتبت البوست ده ليه ؟؟؟

لأن ببساطة وانا سايق النهاردة شفت منظر عجيب والعجيب اني بشوف المنظر ده بقالي 5 سنين بس مش باخد بالي منه الا وهو : ان انا وانا سايق بيعدي من قدامي شخص بمعدل واحد كل متر يعني 100 كل 100 متر ( دي مش مشكلة عادي ) المشكلة بقى ان الناس دي زي ما قلتلكم بتعدي بالطول يعني يجي قدام العربية ويديك ضهره ويمشي قدامك وانت اتصرف بقى وعدي منه ولو اديته كلاكس هيزعل منك وزعل المصريين وحش

مرة من المرات كان في 3 بنات مع بعض(زي العسل ) بيعدوا الطريق قدامي واحده قررت انها تعدي وعدت الحمد لله الثانية قررت انها تقف في نص الطريق من الخضة (معرفش من ايه ) والثالثة قررت انها تقف مكانها والثلاثة ماسكين ايد بعض ... حلولي انتوا بقى المشكلة دي اعدي انا منين ؟

ومرة تانية واحدة كانت ماسكة ابنها وبتتكلم مع واحدة ماشية معاها والواد لقيته في لحظة قدام العربية والحمد لله ربنا ستر وقعدت تقلي مش تحاسب هدوسوا علينا حرام عليكوا ارحمونا (على اساس ان انا بعذبها في جوانتانمو ) فقلت بيني وبين نفسي امال لو كنت خبطته كنتي هتعملي ايه ؟

طبعا المواقف ياما وربنا بيسترها ياما وياما ولا تعليق

دي تكملة للبوست اللي فات وربنا يسهل وحد من المسئولين اللي بيتفرجوا علينا او يسمعونا يحاول يحل المشكلة دي واحنا هنساعده وهنقف جنبه والله ميخفش يعني

وبفكر البوست الجاي يكون عن المطبات والطرق بس بفكر في نفس ذات الوقت اخليه قدام شوية علشان كده المدونة هيضيع منها رونقها الكوميدي

سلااام

ليه يا جدعااااان ليه ؟؟

معلش انا مضايق في البوست ده جدا استحملوني هو طبعا انا مضايق من زمااااان بس الموضوع زاد عن حده خلاص وجبت جاز .... هوسؤال واحد بس ليه الشعب ده بيحب يخالف كل حاجة ؟ يعني مثلا ليه بيحب يقف بره الطابور؟؟ ... ليه بيحب يرمي الزبالة في الشارع ؟؟؟ ... ليه بيحب يعدي الشارع من وسط العربيات ؟؟؟؟ ... ليه بيحب يقف بعربيته في نص الشارع ؟؟؟؟؟ ... ليه بيحب يشرب السجاير في الاماكن العامة ؟؟؟؟؟؟ ... ليه بيحب يمشي في المخالف ؟؟؟؟؟؟؟ ( دي اكتر حاجة بتجنني والله )

واللي يغيظك اكتر الناس تقلك محنا عايشين في بلد متأخرة ومفيش أي احترام للأدمية ... ده اذا كان انت اصلا يا بعيد مش محترم ذاتك الانسانية عايز اللي قصادك يحترمك ازاي !!!! الرحمة يا رب

ولما تيجي تفهم حد ان اللي بيعمله ده غلط يقلك يا عم صلي على النبي هي جت عليا يعني ... انت مالك انت ... يبصلك شزرا ويسيبك ويمشي ... يناولك بونية في وشك انت ونصيبك بقى على حسب لياقته وعضلاته ومستواه الاجتماعي

واللي زاد وغطى إن اللي بيعمل الحاجات دي كلها بيعملها بمنتهى الجرأة يعني ولا كأنه غلط ولا كأنه بيتعدى على حق الغير ولا كأنه سايب 100 واحد واقف في الطابور بقالهم ساعتين مثلا ويروح يقف اول واحد ولا كأنه بيعمل حاجة يا حبة عين أمه ... حرام عليكوا مش تظلموا الراجل

وممكن تلاقي بقى واحد شيك ومتعلم وراكب عربية آخر موديل ويمشي في المخالف بكل برود وبكل غباء ... افهم بقى هل ده علشان:-
1- يوفر 0.059 لتر بنزين
2- يوفر 964 فيمتو ثانية
3- يحرق دمي
4- محمد منير ( اختر الاجابة الصحيحة )

يعني يعملوا حساب واحد زيي دمه بيتحرق ويكتم جواه ... على الاقل يعني يبقى في شوية ذوق شوية انسانية شوية سائل احمر من اللي بيمشي في خراطيم جوه الجسم ده

دي يا جدعان اشياء بديهية يعني على الفطرة يعني اي حد عاقل عنده البتاع الزلالي اللي بيبقى في التجويف العظمي اللي فوق ده يعرف الفرق بين الصح والغلط يعرف ان ده عيب ان لم يكن حرام

بجد والله احنا عمرنا ما هيتصلح حالنا الا اذا احترمنا انفسنا وبدأنا بأنفسنا احنا يعني من القاع لغاية ما نوصل للقمة مش كل حاجة هتعملها الحكومة يعني واحد جاي يقف في الطابور من اوله الحكومه هتعمله ايه يعني ؟؟ تعتقله مثلا مهو مفيش قانون في الدستور يعاقب على كده

وكفاية كده خلاص انا فضفضت وقلت اللي جوايا وحسيت اني استريحت شوية

معلش انا طبعا اتأخرت في الكتابة وده بسبب الكمبيوتر اللي باظ وفضل بايظ اسبوعين وبعد كده جبت كمبيوتر جديد الحمد لله وفي نفس اليوم اللي جبت الجديد اتقطع سلك النت وفضل 10 ايام لغاية ما رجع تاني بس بيني وبينكوا كان 3 اسابيع حلوين الواحد ذاكر فيهم شوية على الاقل وشكلي هقطع السلك تاني لأن الامتحانات قربت ويارب السنة الخبيثة دي تخلص على خير بقى لأني خلاص في دخانة بتطلع من طراطيف شعري

سلااام

مصطلحات

طبعا كل واحد فينا ممكن تحصلوا زلة لسان ده طبيعي يعني بتحصل في أي موقف ينرفزك او يضايقك وده بالضبط اللي حصلي من فترة كده ليست بالوجيزة ولأني لقيت ان انا ابتديت اقول كلام مش لطيف ( لفظ يعني ) وده طبعا لا يتماشى مع وضعي الاجتماعي او حتى منظري قدام الناس قررت ان انا ادور على بديل وباقصى سرعة بس الصراحة مكنتش اعرف ان ربنا هيفتح عليا ب 3 مصطلحات في نفس الوقت والمصطلحات دي وليدة اللحظة يعني مش الفتها او دورت عليها هي جت لوحديها كده وهما :

# انجلينا جولي :
- طبعا دي الممثلة الامريكية المعروفة اللي زي القمر بالرغم من ان فيها برودة دم الاجانب بس حلوة مفيش شك ( حبيبة قلبي )
- هنا بقى معناها لفظ اعجمي بمعنى احتج او اشجب او ادين او اعترض
- بمعنى اصح = لفظ ( grade 1 )
- من مميزاتها : جملة سهلة النطق فيها جناس ناقص متساوية القوام

# هيمينولوبس نانا :
- دي اسم دودة ممكن تصيب الانسان وطبعا باين من اسمها انها مدلعة شوية وبتدلع الانسان اللي بتصيبه ( بالذمة في دودة اسمها نانا )
- هنا معناها جملة اعتراضية بمعنى اسكت ساكت ومتفتحش بقك خالص
- بمعنى اصح = لفظ ( grade 2 )
- من عيوبها : صعوبة النطق و توحي بالهبل المستميت وممكن اللي قدامك يفهم غلط واحتمال تؤدي الى ضربك

# هاكونا متاتا :
- دي المقولة الشهيرة تقريبا على ما اتذكر بتاعة تيمون وبمبة ( من احب الكرتونات الى قلبي )
- هنا معناها طبعا زي ما انتوا شايفين ملهاش معنى خالص وعلشان كده باحبها جدا
- بمعنى اصح = لفظ ( grade 3 )
- من مميزاتها : كلمة ملهاش اي لازمة في الحياة وتقريبا محدش بيقلها غيري

طبعا كل كلمة من دول انا باستخدمها حسب الموقف اللي بتعرضله يعني لو موقف ضعيف باستخدم انجلينا جولي لو الموقف نص نص باستخدم هيمينولوبس نانا لو الموقف شديد قوي باستخدم هاكونا متاتا اما لو الموقف لا يحتمل بقى باستخدم اللفظ علطول ما باليد حيلة

طبعا اللفظ ده شائع بين الشباب لتفتكروا انه لفظ وحش ولا حاجة ( انا مش قليل الادب يا جدعان على فكرة )

وبكده اكون شرحتلكوا جزء من القاموس الخاص بتاعي واللي طورته بما يتلائم وظروف الحياة

N.B : مش عايز لو سمحت اي لفظ في التعليقات هههههههههه

سلااام

تاج 2

انا قلت بقى ايه اخلص التاجات اللي عندي كلها واخلص منها علشان ابقى حر نفسي كده وميبقاش عليا ديون فقلت اعمل تاج كمان ... هو صحيح جه متأخر وده بسبب ان الكمبيوتر اتحرق الحمد لله ( بس طفيته وجبت واحد جديد ) والنت كمان كان مقطوع يعني لما بتبوظ بتبوظ مرة واحدة ... ما علينا التاج التاني اهو : هو طبعا جالي من صديق عمري ابو نصيف ( Dr.Nassef )

لوأعطيتك ثلاث وردات من هم الثلاث الأشخاص اللى هتهديهم الورد اللى معاك ؟؟

الاولى : لماما طبعا حبيبة قلبي فعلا الست دي مش عارف أوفيها حقها ازاي وبالرغم من اني مش باسمع كلامها في بعض الاحيان او في معظم الاحيان ( يعني مش باسمع كلامها خالص من الاخر يعني ) بس فعلا بحبها جدا جدا ومش عارف من غيرها كنت ممكن ابقى عايش ازاي

الثانية : اكيد يعني لبابا حبيبي انا بجد لما ابص للمستوى اللي بابا معيشنا فيه وطلباتنا اللي بيقضيها لينا انا واخواتي باحس بالحسرة طيب انا لما اتجوز مش هحصل 1\4 المستوى اللي انا عايش فيه علشان كده انا بفكر اصرف نظر عن الجواز واعد في بيت ابويا احسن معزز مكرم

الثالثة : لصاحب التاج طبعا محمد نصيف صديق عمري وهو من الشخصيات فعلا اللي الواحد يفخر انه مصاحبهم ولينا مع بعض صولات وجولات ومن ابرزها ( ال 200 كم ) اكيد فهمتني يا ابو نصيف وتتمسى بالخير

=====================================
لو أعطيتك ورقة بيها 3 سطور وقلت لك أكتب فيهم اللى أنت عيزه هتكتب إيه ؟؟

مش عارف بصراحة اكتب ايه بس عايز اكتب عن حالنا وده طبعا مش هيكفيه 3 سطور بس اجمالا انا نفسي البلد يتصلح حالها وترجع مصر بتاعة زمان وارجع افخر تاني اني مصري ومش افكر في يوم من الايام اني اسيبها واهاجر من كتر الغباء والتخلف اللي مليها واللي فعلا بقى يجيب الضغط والسكر والامراض المزمنة

=======================================
ما هو هدفك فى الحياة ؟؟

والله زي اي حد له هدف اني اكون ناجح واحقق اللي باحلم بيه واعلم على التاريخ ( على رأي الدكتور ) واحاول يكون ليا بصمة في المجتمع بالخير طبعا واني اسعد بابا وماما واخواتي واكون دايما جنبهم لما يحتاجوني وحكاية دكتور دي معتقدش انها تفرق معايا

=======================================
إن شاء الله بكرة هيكون أحسن من النهارده"ِهل تصدق هذه المقولة ؟؟ ولماذا ؟؟

والله هو المنطق والتاريخ وحتى الجبر والهندسة بيقولوا ان المفروض انها صح بس في اي حتة الا هنا وده طبعا من اللي شايفه بيحصل حواليا وفي كل مكان كل شئ يوحي بالتأخر وبالفشل مفيش اي حاجة تدي بريق امل لامع من بعيد تثبت عكس كده علشان كده انا مش مصدق المقولة دي بنسبة 74.84%

=======================================
أجمل مقولة سمعتها فى حياتك ؟؟

" ان الرجل لا ينسى اول امرأة احبها والمرأة لا تنسى اول رجل خانها "

ومحدش يسألني ليه لأن ببساطة معرفش

=======================================
من المغنى اللى بتحبه أوى و إيه أحلى أغنية ليه بتحبها ؟؟

عبد الحليم حافظ واحسن اغنية بحبهاله " موعود " وخاصة ايام الامتحانات

=======================================
"غزة" تمثل لك إيه فى حياتك ؟؟

والله انا شايف انها قضية الوطن العربي بس على صغير

=======================================
أعطى لإنتمائك لوطنك درجة من مائة ؟؟

بصراحة 80.06 %

=======================================
لو تزوجت و أنجبت بنتين و ولدين أى الأسماء تختار لهم ؟؟

سؤال غريب لأني مش عارف الموضة اياميها هتبقى ايه بس ممكن اسمي

( معتز - معاذ - هاجر - سلمى )

=======================================
غشيت فى أمتحان و انت صغير ؟؟

ايه الاحراج ده بصراحة آه بس قبل ثانوي وكان مريتين

=======================================
لو أتعرض عليك رشوة كبيرة و انت فى زنقة ماليه هتعمل إيه ؟؟

مش هقبلها طبعا وربنا يثبت اقدامنا يا رب

=======================================
قول 3 صفات ب 3 كلمات بس توصف بيهم شخصيتك ؟

(................ - ...................... - ..................... )complete

=======================================
اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه؟

بابا : مصحف كبير
ماما : هخليها هي اللي تختار
اخواتي : هديهم حقهم ناشف
=======================================
ايه المجال اللى غير دراستك وشايف نفسك فيه قوي ؟

سباق السيارات
=======================================
بتحب السفر؟

جدا من احلى هوياتي
=======================================
طب دلوقتى حالا ايه المكان اللى نفسك تكون فيه ؟

فيينا
=======================================
تمرر التاج ده لمين ؟؟

فاتيما
appy
د\هيما
حكاوي القهاوي
ميرو
=-=-=-=-=-=-=-=-=-=-=-=-=-=-=-=-=-=-=-=-=-=-=
وبكده الحمد لله اكون خلصت ثاني تاج ليا وربنا يسهل هانت فاضل واحد كمان

سلااام

تــــــــــــــاج

ده ببساطة اول تاج ليا على المدونة وفي 2 كمان في الخزنة بس هجاوب بالترتيب هنبدأ الأول بتاج صديقي نبيل " حكاوي القهاوي " وهو التاج بتاع ( أذكر 10 اشياء عن نفسك ) وقررت اني اجاوب التاج ده بحيث اقول 10 ثوابت عن نفسي لأن طبعا انا من انصار ان الآخرين هما اللي لازم يوصفوا الآخر مش ينفع حد يتكلم عن نفسه وهبدأ على بركة الله

-1-

انا اسمي محمد عماد مواليد 15\1\1986 يعني عندي دلوقتي 22 سنة وساكن في الزقازيق الدور التاسع وعندي 3 اخوات بمعدل اخ واختين وانا اكبر اخواتي يعني القدوة يعني لازم اسمع الكلام يعني المثل الاعلى يعني اجيب الطلبات يعني يخرب بيت القرف

-2-
انا في سنة خامسة طب بشري جامعة الزقازيق يعني بادرس طب يعني المفروض ابقى دكتور يعني اعالج المرضى يعني اخفف الآمهم يعني ابقوا قابلوني

-3-
بحب اسمع الموسيقى قوي وهتلاحظوا ده في الموسيقى الغريبة اللي شغالة في المدونة وبحب اسمع عبد الحليم وخاصة " موعود " ايام الامتحانات وطبعا باسمع لأم كلثوم وخاصة " سيرة الحب " وباحب اسمع الاغاني الهادية بصفة عامة

-4-
مش بحب الدوشة ومش بحب الكلام الكتير وبحب الهدوء والتأمل وبحب اكلم نفسي كتير وبصوت عالي كمان يعني صباح الجنان يعني صباح الهبل يعني صباح اللي بتغني ويمكن ده بيزعل ناس كتير مني ويفتكروا اني مش بحب اتكلم معاهم بس دي طبيعة والله مش بكيفي

-5-
مش باعمل صداقات بسهولة بس لما باعرف حد بيبقى صاحبي بجد بكل ما له من حقوق وعليه من واجبات وطبعا لازم يكون محترم وابن ناس وبرضه باعرف ناس من نوعيات تانية بس على الطاير كده مش يتقال علينا اصدقاء يعني

-6-
رومااااانسي جدا بس مش ببين ده لحد ولا حتى لماما او بابا اواخواتي وده خيبة تقيلة طبعا لأنهم بيزعلوا بس مش عارف ليه انا مش باعرف ابينها ؟ ومستني لغاية ما الاقي بنت الحلال واهريها حب ورومانسية

-7-
عندي انيميا الفول ( FAVISM ) يعني مش باكل ولا فول ولا طعمية ومش باحب المحشي بجميع انواعه واللبن بقى مبيحبنيش والعلاقات ما بينا متوترة يعني من الآخر يا بخت اللي هتتجوزني

-8-
بحب العربيات والسواقة جدا وبحب السفر كلما امكن هذا طبعا وانا باسمع موسيقى او أغاني هادية وكان نفسي ابقى مهندس سيارات بس زي ما انتوا عارفين بقى المجموع وشرف العائلة والوضع الاجتماعي والحاجات دي

-9-
بيقولوا ... بيقولوا يعني اني دمي خفيف ومش بحب النكد ولا لوي البووووز وبحب التفاؤل جدا وواخد الامور EASY ( كدابين طبعا ) بس ايام الامتحانات معرفش ابويا وبيجيلي ارق ومش باعرف انام واعد اعيط بس مش تقولوا لحد

-10-
بارد لأبعد الحدود ومن الصعب جدا ان حد يضايقني ومش بتنرفز بسهولة الا اذا كنت راكب العربية بابقى شخص تاني خالص ( على رأي ماما ) وبتبقى روحي في طراطيف شعري ومش بحب اشوف اي حاجة غلط خالص بس هعمل ايه ؟ ما باليد حيلة ولا حياة لمن تنادي

وبكده يا احبائي الحلوين اكون خلصت اجابات اول تاج ليا الحمد لله على خير ومستني تعليقاتكم واللي نفسه يقول حاجة يقولها بجد مش يخاف انا مش بتنرفز زي ما قلتلكوا بس اللي هيقول حاجة متعجبنيش مش هيدخل هنا تاني هههههه

والتاج انا بهديه :

1- زيزو
2- dr.nassef
3- دودو

سلااام

لوووك العبيط

اذيكوا يا جماعة .. انا في البداية عايز اقول اني مش بكتب بانتظام في المدونة وده لعدة اسباب منها اني المفروض مشغول في المذاكرة لأني في سنة خامسة طب ( ربنا ما يوريكوا ) ... وده المفروض طبعا مع اني قاعد على النت حوالي 10 ساعات في اليوم ، ومنها برضه اني مش خفيف يعني باخد وقت عقبال لما افكر وعقبال لما اكتب وممكن امسح كل اللي كتبته في لحظة لأنه مش عاجبني ..وهكذا

النهاردة هحكيلكوا عن شخصية انا باعتبرها نصي التاني وفي نفس ذات الوقت باعتبرها بنتي او اختي الصغيرة ( علشان مش اكبر نفسي )

اسمها : ملك الشهيرة بــ (كوكي ) و ( ملووك ) وانا بحب اقلها ( لوك العبيط )
سنها : 4 سنين
وهي تبقى بنت عمي وساكنة في الشقة اللي قصادنا يعني تقريبا ساكنة معانا

لما اتولدت كنت انا في ثانية كلية يعني كان عندي 19 سنة يعني الفرق بيني وبينها 19 سنة فعلشان كده باعتبرها بنتي وفعلا انا علمتها حاجات كتير يعني من الآخر انا اللي مربيها

اول مانطقت اسمي كانت بتقول ( امم ) يعني محمد وياسلااااام بقى على اسم الدلع ( ممش ) يعني مشمش ... انا فعلا حبيت الاسامي دي اكتر من اسمي الحقيقي اللي انا اصلا نسيته بفعل عوامل الزمن وخاصة لو انت معاك طول عمرك سواء في المدرسة او الكلية حوالي 100 واحد اسمهم ( محمد ) ويضطروا ينادوك باسم الاب اللي هو ( عمدة ) مش وحش برضه فيه حزم كده

من اقوالها المأثورة :
1- مصاص الدماغ = مصاص الدماء
2- كرستيانوا روماردو = كرستيانو رونالدوا
3- جوفينتوس = يوفنتوس ( نادي ايطالي )
4- فوخ = خوخ
5- صفيق - عاعة - امعة = ؟ ( دي الشتيمة بتاعتها )
6- هابل = اهبل

بتخاف جدا تروح من بيتنا لبيتها ( طرقة 6 متر ) ولازم حد يوصلها واللي غالبا بنسبة 80 % باكون انا ومش يحللها تروح الا في عز الفيلم او الماتش او النوم

حافظة فيلم عمر وسلمى صوت وصورة وموسيقى تصويرية وبتسمعه كل يوم قبل ما تنام

كان زمان بتستناني لما آجي من الكلية وتجري عليا زي ما يكون بتجري على ابوها وتترمي في حضني بس ده كان زمان ايام لما كنت باروح الكلية لكن دلوقتي تقريبا هي زهقت مني من كتر القعدة في البيت

ليا معاها ذكريات كتيييير قوي مفتكرتش منها دلوقتي الا ( اول حقنة ادتها في حياتي ) كانت للأسف ليها ومن ساعتها بفكر اسيب كلية الطب ومن ساعتها برضه العلاقات ما بينا متوترة شوية

كانت وما زالت تيجي وتعد على رجلي وانا على الكمبيوتر وتقلي فرجني على صوري يا ( آبيه محمد ) اصل انا عملها البوم صور فيه حوالي 200 صورة وكل عيد ميلاد باديهلها هدية ... لكن لو بتكلمني عادي ومش عايزة حاجة تقلي يا ( محمد ) وساعات يا (هابل )

لما تتخانق مع حد من اخواتي او حد من اخواتها بتيجي تشتكيلي انا صحيح مش باعملها حاجة بس برضه بتيجي تشتكيلي تاني

انا حطيت صورها وياريت تسموا وانتوا بتشفوها هههههههه

بصوا اللي عندوا عريس بقى مش يقلي عليه علشان انا مش عايز اجوزها لحد ولا اقلكوا ممكن افكر في الموضوع ده

وعقبال ولادكوا وولادي ( اللي لسة في علم الغيب ) بقى

N.B : انا بلون الحاجات اللي بين الاقواس باللون ( البرتقالي ) لأني بحب لونين هما الاخضر : عملته خلفية وهو نفس لون عربيتي حبيبتي ، والبرتقالي : اللي بلون بيه ما بين الاقواس

سلااام

انا اتفشخت يا mens

امبارح رحت انا وماما واخواتي البنات علشان نزور جدتي وخالي في البلد ( ويارتني ما رحت ) المهم وصلنا بالسلامة وماما قعدت مع جدتي يتكلموا مع بعض ويحكوا لبعض واخواتي البنات قعدوا مع بنات خالي وقعدوا يذاكروا مع بعض ( عندهم امتحان تاني يوم ) وانا بقى قعدت مع بنت خالي الصغيرة اللي عندها 5 سنين ( ويارتني ما اعدت )

هي : آبيه محمد .... تلعب معايا دومينه؟
انا : ايه ده انتي بتعرفي تلعبيها ؟ طيب وماله العب ؟
هي : جريت تجيبها زي ما يكون شافت فريسة يا عيني ( وانا قاعد زي العبيط ولا فاهم حاجة )

المهم جابت الدومينه وجابت الخشبة اللي بنلعب عليها وانا قاعد مخضوض حسيت اني ورطت نفسي في حاجة انا مش قدها وبدأنا نلعب الدومينه انا وهي لوحدينا ( يعني استفرضت بيا )

فضلنا نلعب حوالي 14 دور وكانت النتيجة انها كسبتني 10 ادوار وانا كسبت 4 ادوار بس ... إهئ إهئ إهئ

وهي تنصحني بعد كل دور وتقلي تحب تلعب تاني يا آبيه محمد ؟ وهنا فعلا حسيت ان آبيه دي بقت شتيمة وانا اقبل التحدي واقلها ماشي نلعب تاني وآخد فوق دماغي تاني

المشكلة بقى انها مش تعد ساكتة كل اللي رايح واللي جاي
ماما ... ماما : آبيه محمد مبيعرفش يلعب خالص وانا اسمع واعد ساكت هتكلم اقول ايه ؟؟!!
بابا ... بابا : كسبت آبيه محمد 7 ادوار في الدومينه وانا احط راسي في الارض ... و فضيحتاااه
عمتو ... عمتو ( اللي هي مامتي ): تيجي تلعبي معايا بدل آبيه محمد ؟؟ وانا اقلها لأ لأ يا ماما كفاية انا
كان فاضل بس انها تكلم بابا وتقله ابنك مش نافع يا عمو

الدور ال 14 كان كل اللي في البيت بيتفرجوا علينا ولا كأنه ماتش كورة وبعديه انا اعتزلت خلاص وعارف ان فضيحتي هتبقى بجلاجل في العائلة خلال اسبوع بس هعمل ايه ؟ ما باليد حيلة

وبعد الغذاء ولسة بشرب كوباية الشاي المتينة علشان انسى جت نفس السفروتة تاني وفي براءة تامة تقلي :
آبيه محمد تلعب كوتشينة ؟؟
انا : على جثتي .... وحياة امي ابدا ... يالا يا ماما انا مروح ... مش قادر اعد اكتر من كده
وهي تسخسخ على نفسها من الضحك وكأنها فرحانة فيا بس يالا انا اللي اديتلها الفرصة دي

بس بعيدا عن البهدلة اللي انا اتبهدلتها لما فكرت بيني وبين نفسي شفت اد ايه البنت لسة صغيرة وباسم الله ما شاء الله ذكية ولماحة وعارفة " البلاطة " وفي نفس ذات الوقت صعبت عليا لأنها هتدخل مدارس مصرية يعني العوض على الله في الذكاء ده وهو ده حال كل الاولاد المصريين اللي بيقل ذكاءهم بعد دخول المدارس وسلملي على الدروس الخصوصية

وعجبي

على فكرة البنت اسمها آية

سلااام

وأنا ذنبي إيه ؟؟؟

بابا .. بابا .. بابا ( اخيرا بابا رد ) : ممكن آخد العربية اخرج الف بيها شوية علشان مخنوق قوي ؟
بابا ( بصلي ومردش )
بابا .. بابا .. بابا ( اصلي انا غلس شوية ) : قلت إيه يا بابا ؟
بابا ( سبني ومشي )

ماما ( بتتفرج على الTV ) انت معندكش دم يابني ؟ مبتحسش ؟
انا ( ليه الغلط ده بقى )
ماما : انت معرفتش ان البنزين غلي ؟؟
انا : إيه ؟؟؟ !!!!! what ؟؟؟؟؟؟ امتى ؟؟؟؟ وفين ؟؟؟؟؟ وازاي ؟؟؟؟

وجريت على النت علشان اعرف الاخبار وفوجئت بالفاجعة الكبرى وزيادة اسعار البنزين ال 90 بقى ب 175 قرش ( مش بحط منه ) والبنزين ال 92 بقى ب 185 قرش ( اللي بحط منه ) إهئ إهئ إهئ

انا ساعتها مكنتش عارف اعمل ايه ؟ فعلا حسيت اني معنديش دم ومش بحس .... وبالضبط بالضبط افتكرت الشعور اللي جالي لما البنزين زاد واحنا في مرسى مطروح ( واحنا في الغربة يعني ) وفاكر انا احنا دفعنا يوميها 120 جنيه بنزين بس واحنا راجعيين


وجت على بالي علطول العربية حبيبتي يعني ال 2000 سي سي .. يعني الكربيراتير .. يعني ال 4 سلندر .. يعني اللي بتاخد صفيحة بنزين في اليوم ( يعني 20 لتر ) وحسيت ساعتها اني كرهتها فجأة مع ان ملهاش ذنب بس هفش غلي في مين


وجه على بالي برضه اسعار المواصلات منا لو ركنت العربية وخدت مواصلات هتبقى هي هي وكأننا معملناش حاجة بل بالعكس هتبهدل في المواصلات اكتر

وجه على بالي الواد بلية الميكانيكي وهو بياخد 2 لتر من التانك علشان يغسل بيهم الموتور هقله ايه ساعتها ؟ اغسله بمية الدهب ارخص


وجه على بالي بابا حبيبي وتخيلته وهو بيقلي انا هبيع العربية يا محمد .... وأنا بقله :على جثتي يا بابا


وجه على بالي برضه لما نيجي نسافر مطروح تاني ولا حتى شرم او حتى القاهرة والمبلغ المحترم اللي هيضيع في البنزين لوحده واللي طبعا مش هيخلينا نسافر في حتة ونعد في البيت

انا مش معترض على زيادة البنزين لسمح الله ...... بس لما اسمع تاني يوم يا جدعان إن الغاز بيروح لإسرائيل مدعم ( يالهوي يا مامي ) ولمدة 20 سنة وانا هنا عمال اضرب اخماس في اسداس واشوف هوفر ثمن البنزين لاسبوع واحد ازاي


ومش معترض برضه ان البنزين يغلى حاش لله ...... بس لما آجي احط بنزين 92 في العربية واشم الريحة الزبالة بتاعته والاقي العربية بتعيط منه ( بتكركر يعني ) يبقى حرام وحسبي الله ونعم الوكيل



وإيه يعني لما البنزين يزيد مهو بيزيد في كل دول العالم .... بس مسمعتش قبل كده انه بيزيد في الدول المصدرة للبترول بل بالعكس ده بيرخص يبقى دمي له الحق يتحرق ولا لأ ؟! وان زاد بيزيد بنسبة بسيطة بالنسبة للزيادة في المرتبات مش بيزيد اكتر من المرتبات



وكله كووووم وزيادة رسوم التراخيص كوووم تاني ( انا الحمد لله لسة مرخص الاسبوع اللي فات ) بس ليه ؟؟ وعلشان ايه ؟؟ علشان العربيات الفاخرة ؟!!! طيب وانا ذنبي ايه ؟؟؟



وفكرت كده مع نفسي ان احنا مش قدامنا الا خيارين
اولهما : ان احنا نمشي واهي رياضة
وثانيهما ( وده انا نفسي فيه بجد بس حد يشجعني ) : ان احنا نعمل زي الصين والدنمارك ونجيب عجل ( درجات هوائية )


انا عن نفسي هجيب عجلة ماركة مرسيدس بنز بحوالي 19000 جنيه مصري ( انا بهزر طبعا هو آخري عجلة صيني ب 200 جنيه ) واللي عجباه الفكرة دي ممكن يقلي في التعليقات بجد

وعشايا عليك يا رب ... وحسبي الله ونعم الوكيل .... وهيمونولوبس نانا



ملحوظة : انا بعتذر للضاحك الباكي ( ابو نبيل ) عن التاج وهجاوبه كمان شوية بس علشان حالتي متسمحش

سلااام

عريس وعروسة

أنا الحمد لله زفيت ما يقرب من حوالي 30 عروسة وعريس ( عقبالكوا ) ما بين خطوبة ودخلة وكتب كتاب في العربية حبيبتي المرسيدس طبعا والمرة دي هحكيلكوا عن مواقف لذيذة كانت بتحصل اثناء الزفات آخرها كان من اسبوعين

الموقف الاول :

كان فرح المحروس ابن عمتي وكان جايب عروسته من سفر والمفروض اني اقابلهم في مدخل الزقازيق علشان نبدأ الزفة ونوصلهم للقاعة وما إلى ذلك ، المهم الساعة كانت 8 مساء وبالفعل بدئنا الزفة وراحت العروسة لبيت عمتي علشان تصلح ال make up بتاعها على الماشي كده ونفاجأ بعد وصولنا لبيت عمتي إن مفيش حد في البيت والمفتاح بتاع الشقة مع ابن عمتي التاني والموبايل بتاعه مقفول

المهم جه المحروس بعديها بنص ساعة والعروسة صلحت ال make up بتاعها وكله تمام والساعة بقت 9 وهنبدأ على بركة الله وعملنا الزفة الحمد لله ووصل العريس والعروسة للقاعة واحتفلوا وكان كله تمام وخلاص الساعة بقت 12 بليل وباستعد بقى علشان اروح اوصلهم لعش الزوجية المهم ركب العريس والعروسة ولقيت ابن عمتي

بيقلي :- يالا بقى يا محمد هنتصور فين ؟؟؟

فبصتله بصة غريبة كده مش عارف اوصفها وقلتله :- أفندم ؟؟!!!! تتصور فين ؟؟؟؟ هو انت لسة متصورتش ؟؟؟

فقالي :- لأ لسة

انا طبعا مسكت نفسي بالعافية ولفينا الزقازيق كلها حتة حتة لغاية ما لقينا استوديو فاتح ( الساعة 1 الفجر ) واتصوروا وروحوا البيت الساعة 2 الفجر وكانت دي اغرب زفة في حياتي التصوير بعد الفرح ( سبحان الله )

الموقف التاني :

كنت بازف مرة ولقيت العروسة فجأة كده بتقلي :- انا عايزة اطلع كوبري يا محمد ..... طيب بالله عليكوا لو انتوا مكاني تعملوا ايه ؟؟!!

المهم طلعتها كوبري وبعد ما نزلنا من على الكوبري قالتلي :- عايزة اطلع الكوبري التاني كمان يا محمد ( اصل الزقازيق فيها 2 كوبري بس )

( الصبر يا رب) المهم طلعتها الكوبري التاني وبعد ما نزلنا قالتلي :- لف واطلعهم تاني بقى يا محمد

قلتلها :- انتي طالق بالتلاتة

الموقف الثالث :

في زفة من الزفات لقيت بقى المرة دي العريس ( واحد صاحب بابي ) بيقلي :- محمد لف بينا على قد ما تقدر ( كانت دخلة )

فقلتله :- ليه خير ؟؟

قالي :- اصل مش ليا نفس اروح دلوقتي

قلتله :- هو انت لسة بدأت يا انكل اصلا علشان ما يبقاش ليك نفس ؟!

قالي :- لف بينا بس يا محمد وبلاش احراج ( بتهيألي كان بيهزر )

قلتله :- ماشي انت تأمر يا انكل

وفضلت الف والف والف لغاية ما البنزين خلص ودخلت البنزينة علشان احط بنزين ( عمركوا شفتوا عربية عروسة وعريس بتحط بنزين ) وروحتهم يوميها الساعة 3 الفجر ( مكنش بيهزر ) ومش عارف ايه اللي حصل بعد كده ومش عايز اعرف

دي اكتر المواقف اللي انا فاكرها وحصل حاجات تانية كتير بس مش جاية على بالي دلوقتي

وطبعا بأقول لكل اللي لسة ما اتجوزوش عقبالكوا جميعا وانا اولكوا وطبعا أنا تحت الامر في أي زفة وهسيب رقم تلفوني في الكونترول

سلااام

يوم في حياتي

معلش يا جماعة اتأخرت في الكتابة الفترة اللي فاتت لأكتر من سبب منهم ان مكنش في حاجة بتيجي على بالي ( الوحي يعني ) والحاجة التانية اني كنت بامر بمرحلة عدم الانحياز الشهيرة ، ومحدش يسألني يعني ايه مرحلة عدم الانحياز !!!

المهم نبدأ البوست الجديد على بركة الله وهحكيلكوا النهاردة عن يوم جميل جدا جدا عند الميكانيكي صديقي مع عربيتي حبيبتي المرسيدس

بدأت الحكاية بأني سمعت صوت تزييق خفيف جدا في العجلتين اللي قدام والصوت ده مش بيجي إلا مع المطبات وبما أنكم عارفين طبعا ان البلد كلها متكسرة وكلها مطبات إذا نستنتج ان انا كنت باسمع الصوت ده علطول وطبعا زي ما انتوا عارفين اني مبحبش عربيتي تشتكي من أي حاجة فقررت اني اروح للميكانيكي علشان يكشف عليها ويعمل اللازم

المهم رحتله والراجل قام بالواجب الصراحة ورفع العربية ونام تحتيها وكشف عليها وبعد الفحص والتدقيق والتمحيص طلع

قالي :- إيه يا دكترة ، العربية عايزة دراع المونيا

أنا ( بيني وبين نفسي ) :- ابتدينا القرف المهم : يعملوا كام دول يا حاج سيد ؟

قالي :- يادكتور نجبهم ونركبهم ونبسطك وبعد كده نبقى نشوفهم بكام بسيطة يعني

أنا :-لا يا عم منت كل مرة بتقلي كده وبادفع 1000 جنيه في الاخر

قالي :- لأ المرة دي بسيطة الحمد لله الدراعين يعملوا حوالي 250 جنيه

انا ( باخد نفسي ) :- الحمد لله ، طيب انا هروح اجبهملك وشوف باقي العربية عقبال لما آجي بقى

قالي :- من عنيا يا دكترة بس كده انت تأمر

المهم طخيت المشوار المتين ( حوالي كيلو متر ) طبعا من غير عربية لأنها مرفوعة ورحت للراجل وجبت الدراعين الحمد لله ب 240 جنيه مش 250 زي ما هو قالي ورجعتله لقيته مقابلني بابتسامة عريضة على وجهه

قالي :- إيه يا دكترة ، العربية عايزة ( دوشمة يمين )

انا ( بمنتهى البلاهة ) :- إيه الدوشمة دي يا حاج سيد ؟

هو :- يعني خزنة فرامل ورا يمين

انا :- يعني دوشمة = خزنة فرامل ورا يمين ، طيب متقول كده من الاول

هو :- معلش يا دكترة كنت فاكرك عارفها

انا ( بابتسامة ساخرة ) :- لا مختدهاش في الكلية دي ، وتعملها كام الدوشمة دي ؟

هو :- يعني حوالي 100 جنيه بس

انا :- ارحمني يا رب

المهم طخيت نفس المشوار تاني علشان اجيب الدوشمة وجبتها الحمد لله ب 95 جنيه مش ب 100 زي ما هو قالي ورجعتله ولقيته مقابلني بنفس الابتسامة العريضة ولسة هيقلول الكلمتين رديت عليه بسرعة وبصوت عالي من على اول الشارع ( يعني كل الناس سمعوني )

وحياة ابوك منت مكمل يا شيخ خلاص معدش معايا فلوس ومش هطخ المشوار ده تاني ويحرقك انت والعربية في يوم واحد ( طبعا الجزء الاخير ده كان في سري ) وهو يضحك وانا ماسك نفسي بالعافية ونفسي اضربه

المهم ما علينا خلصت الموضوع ده وخد مني 3 ساعات شغل و حوالي 4 كيلو مشي وحوالي 335 جنيه ورجعت العربية حلوة الحمد لله والحرارة نزلت

هيجي واحد منكوا وهيكتب في التعليق طيب متبيع يا عم العربية دي وهاتلك واحدة جديدة وريح دماغك فهرد عليه بمنتهى البساطة وأقله :- العربية دي حتة مني ولا يمكن افرط فيها وليا معاها ذكريات حلوة وبرضه ذكرات وحشة

بس المشكلة واللي علشانها كتبت الموضوع ده ان ربنا ابتلانا بطرق بايظة ما يعلم بيها الا ربنا واللي يغيظ اكتر انهم يقلولك الحوادث بتكتر والناس بتموت قال يعني مش عارفين السبب ولاد ......

واختم كلامي واقول حسبي الله ونعم الوكيل

سلااام

الساحرة المستديرة

أنا وصحابي ( الأعزاء ) متعودين نلعب كورة كل يوم خميس في محاولة يائسة لرفع لياقتنا البدنية بما اننا في كلية مينفعش فيها انك تمارس رياضة او حتى تتمشى .... المهم بنروح نلعب لمدة ساعتين و كل فريق مكون من 6 افراد وعلى فكرة مفيش ( حكم ) ....مفيش ايه ؟؟ مفيش حكم

اللي بيحصل بقى :-

الكورة مع الفريق الاحمر ونبتدي اللعب والكورة دلوقتي في نص الملعب مع حمادة شلضم وبيقول ( foul ) ويجي واحد من الفريق الابيض اسمه سيكو بطاطا وبيقول الكورة مش ( foul )
شلضم : والله الكورة ( foul )
بطاطا : والله مهي ( foul )
شلضم : عليا النعم ( foul )
بطاطا : طيب عليا الطلاق مهي ( foul )

......... بعد مرور 5 دقائق

الكورة اتلعبت (foul ) وطلعت ضربة مرمى وهيلعبها الحارس عبده كفته والكورة دلوقتي في نص الملعب وماشي بيها برعي افتكاسات من الفريق الابيض ويشوط الكورة وبيقول ( hands ) ويجي واحد من الفريق الاحمر اسمه شفتورة الأقرع ويقول الكورة مش ( hands )
برعي : والله الكورة ( hands )
شفتورة : والله مهي ( hands )
برعي : وحياة امي ( hands )
شفتورة : ورحمة ابويا مهي ( hands )

.......... بعد مرور 10 دقائق

الكورة اتلعبت ( hands ) وكالعادة طلعت ضربة مرمى وهيلعبها الحارس كيكو الصخرة والكورة في نص الملعب مع كابتن الفريق هيرو بيكنباور ( ده انا على فكرة ) وبيعمل through للمهاجم حمادة الارجنتيني اللي بنفرد بالحارس عبده كفته وبيرقص الحارس ويطلعها بره الغبي علشان تكون في النهاية ضربة مرمى ................... الحمد لله عدت الهجمة من غير مشاكل

يلعب الحارس عبده كفته ضربة المرمى وتوصل للمخضرم عسكر RBJ اللي يطلق قذيفة تيجي في ايد المدافع كرملة الملصق ( من غير قصده والله ) ويقول عسكر الكورة (penalty ) ويجي واحد من الفريق الاحمر اسمه تاتا F16 ويقول الكورة مش (penalty )
عسكر : والله الكورة (penalty )
تاتا : والله مهي (penalty)
عسكر : بص هي (penalty) يعني (penalty)
تاتا : مش هتتلعب (penalty) يعني مش هتتلعب (penalty)
........ وبعد مرور 15 دقيقة

الكورة اتلعبت (penalty) وكالعادة طلعت ضربة مرمى ويلعبها الحارس كيكو الصخرة والكورة دلوقتي في نص الملعب مع تاتا F16 اللي بيجري بسرعة 80 كيلو متر في الساعة ( اخويا على فكرة ) وبيشوط قنبلة تدخل الجون .....و جوووووووووووووول وجووووووول وجووووول

إيه ده ؟؟!! فين الحارس عبده كفته ؟؟؟!!! يا كففففففته ؟؟؟ .... وبعد مرور 5 دقائق يظهر عبده كفته وابتسامه عريضة بتغطي وجهه ولاعبي الفريقين واقفين في حالة ذهول ومش عارفين نقول ايه ؟
ويقول عبده كفته : لمؤاخذة يا جماعة كنت بعمل مكالمة مهمة جدا .
يجي مين بقى ؟ يجي سيكو بطاطا ويقول الكورة مش ( goal ) ويرد عليه بسرعة من الفريق الاحمر حمادة شلضم والله الكورة ( goal )
بطاطا : الحارس كان بره يعني مش ( goal )
شلضم : وانا مالي هو الحارس بتاعي ولا بتاعكوا
بطاطا : انا قلت الكورة مش ( goal )
شلضم : هتتحسب ( goal ) غصبن عنك

........ وبعد مرور 10 دقائق

الفريق الابيض بيسنتر من نص الملعب لأنها اتحسبت ( goal )

وينتهي الماتش بنتيجة 2- 1 لصالح الفريق الاحمر بعد الغاء اكثر من 10 اهداف للفريقين

دي يا جماعة ببساطة المأساه اللي بعيشها كل يوم خميس لمدة ساعتين متواصلتين بنلعب فيهم نص ساعة وبنتخانق على التحكيم ساعة ونص علشان كده انا حاسس فعلا ان في تغيير جامد في اللياقة بتاعتي لأني لاحظت اني معنتش بأقدر امشي اكتر من 10 دقائق بسبب الضغط اللي جالي واكتشفت كمان اني بحرق في الساعتين دول حوالي 3.5 لتر دم من اجود انواع الدم

واتحايلت عليهم نلم فلوس من بعضينا ونشتري ( حكم ) محدش وافق وده تقريبا لأنهم بيحبوا الاسلوب ده من اللعب

ومحدش يلمني لو انفجرت في يوم خميس ولا حاجة

سلاام

احنا وهما

رحت مع ماما السوق يوم السبت اللي فات كالعادة لأنه يوم اجازتي وده طبعا مش اول يوم سبت ليا مع ماما في السوق ومعتقدش انه هيبقى الاخير لو لينا في العمر بقية

المهم السوق ده زي منتوا عارفين انه مكان بنشتري منه الخضار والفاكهة والحاجات دي بس عندنا هنا بيزيد عليه ان فيه بتلاقي اغرب كلام واقبح شتايم واعجب ناس ممكن تشوفها في حياتك

اليكم المشهد :- انا قاعد في العربية مستني ماما لما تجيب حاجاتها ( وده طبعا مش كسل مني اني اروح معاها واشيل الشنط لسمح الله وانما بوفر مكان لواحد تاني اولى مني بدل معمل زحمة على الفاضي ) وإذ فجأة لقيت اتنين ستات ماسكين في بعض ضرب وشتايم انا نفسي حسيت اني بتفرج على فيلم اسباني مش فاهم منه حاجة والناس اتلمت عليهم في محاولة لفض الاشتباك بين الجبهتين ( وهما جبهتين فعلا ) المهم الخناقة دي بدأت وانتهت 3 مرات وعلى فكرة انا سبتهم وهما لسة بيتخانقوا معرفش وصلوا لفين بعديها بقى .

ساعتها ابتديت ابص حواليا لقيت فعلا اد ايه الشعب المصري بيناضل علشان يعيش ابص يمين الاقي واحدة يدوبك بتشتري ربع كيلو طماطم على قد الفلوس اللي معاها وابص شمال الاقي واحدة بترجع حاجات علشان مش معاها فلوس وابص فوق الاقي واحدة بتدور على حد يديها فلوس علشان اجرة المواصلات اللي تروح بيها علشان فلوسها خلصت .

ففكرت بيني وبين نفسي الناس دي ازاي عايشة ؟ لما احنا نعتبر متوسطي الدخل ويدوبك بنسلك نفسنا في ازمات الحياة الناس دي بتعمل ايه علشان تعيش اصلا ؟ ولما احنا بنفضفض مع بعضنا على المدونات او حتى بالكلام والناس بتقراه ونتعرف على وجهات النظر المختلفة .

الناس دي بتعبر عن نفسها ازاي ؟ او بتعرف اللي بيجرى حواليها ازاي ؟؟ ولا الناس دي كل همها ازاي توفر لقمة العيش ليها ولولادها وخلاص !!!!
ومحدش هيلمهم طبعا بل بالعكس احنا زي ما بنغضب لفلسطين بره لازم نغصب للناس دي جوه لأننا اخوة
ومحدش هيلمهم لما حد يجي يتكلم معاهم عن قضايا الوطن ويقوله سيبني في حالي ياعم وسيبني اعيش
ومحدش هيلمهم لما نلاقي فيهم الحرامي والمرتشي والنصاب والقاتل
ومحدش هيلمهم لما نلاقي فيهم اطفال الشوارع

ما علينا دي كانت مقارنة بسيطة بينا وبينهم مش علشان ارفع من معنوياتكم واعرفكوا ان في ناس مش لاقية تاكل واقل مننا وطبعا دول بيمثلوا 75% من شعب مصر ..... ولكن علشان ابينلكوا ان تقريبا احنا خلاااااااااااااااااص

سلااام

الضمير العربي

يعرض في الآونة الاخيرة على شاشات التلفزيون اوبريت " الضمير العربي " وهو تجسيد للحالة التي يعيشها العرب والمسلمون في ال 10 سنوات الاخيرة بما فيها من تعذيب و افعال وحشية وممارسات شيطانية ( شيطانية ايه ده الشيطان اطيب منهم )

انا صحيح مشفتش غير آخر 10 دقايق منه لأني عارف انا هشوف ايه وهعيط هعيط بمزاجي اوغصب عني هعيط وانا بصراحة مش بحب اشوف الحاجات دي بيني وبينكوا ( لأني بتخيلها على نفسي ) وده شئ صعب جدا

واتذكر من حوالي 8 سنوات ظهر اوبريت مماثل اسمه " الحلم العربي " وهو مشابه لهذا الاوبريت ويتناول أيضا احوال العرب آنذاك وكل الناس شافته وكان ليه تأثير جامد على الناس وده شئ كويس مش وحش بس المشكلة بقى .... احنا هنفضل نتفرج لغاية امتى ؟ وهنفضل نعيط لغاية امتى ؟ وهنفضل نندب حالنا وحظنا لغاية امتى ؟ انا مش بقول نروح نحارب او نعمل مظاهرات - انا كل اللي برجوه من نفسي قبل اي حد ان احنا نغير اسلوب حياتنا ونصحي جوانا ضميرنا " الضمير العربي " اللي بيه ولا هنحتاج نحارب ولا حتى نعمل مفاوضات وهنرجع تاني زي زمان نفخر بإننا عرب ونرفع راسنا في كل مكان ونصحى ونفوق ونعرف ان ده كله تخطيط صهيوني لغسيل مخنا ( إن وجد )

انا على فكرة مبحبش اتكلم في السياسة او المواضيع دي بس انا فعلا زهقت جبت جاز زي ما بيقولوا ويارب نرجع تاني مسلمين ونسترد كرامتنا وإلا هنشوف يا اما .................... يا اما .............................

سلاااام

أحداث مؤسفة

كنت تقريبا في اولى ثانوي يعني من 9 سنين ورايح المدرسة الصبح وكنت متعود اتفرج على التلفزيون وانا بافطر المهم لقيتهم جايبين انتهاك وزير الدفاع الاسرائيلي لحرمة المسجد الاقصى في حماية مش عارف 3000 جندي اسرائيلي وانتفاضة الاقصى الثانية والحوارات اللي كلكوا عارفينها دي

المهم رحت المدرسة واتلكمت مع صحابي في الموضوع عادي يعني كأي خبر في التلفزيون وإذ فجأة جه في بالي ان دي الانتفاضة الثانية يعني معنى كده ان كان في انتفاضة أولى يعني الحكاية دي بقالها 60 سنة

صحيح أنا قبل الحكاية دي كان كل معرفتي عن فلسطين انها دولة عربية محتلة من قبِل اسرائيل وان احنا لازم ندعيلهم ونتبرعلهم وخلاص لا اكتر ولا اقل

لكن بعد الحكاية دي انا ابتديت اهتم بالموضوع صحيح مش الاهتمام الكافي بس ابتديت ادور واعرف التاريخ واتابع الاخبار واسمع عن الشهداء اللي الواحد كان بيشفهم ويتمنى يكون مكانهم وتوالت الاحداث مرورا بحرب العراق واحتلال افغانستان واغتيال الشيخ احمد ياسين اللي اغتياله كان ليه قصة ظريفة معايا واحوال المسلمين اللي لا تسر عدو ولا حبيب في كل مكان حتى في الدول اللي مكنش فيها حروب

المهم نرجع مرجوعنا - رجعت حكاية فلسطين بالنسبة ليا عادي تاني وكأن مفيش حاجة الواحد بيسمع الاخبار ويشوف المجزرة الفلانية والاطفال اللي ماتوا واللي بيموتوا والللي هيموتوا ويصعبوا عليا شوية وخلاص بس الواحد في قرارة نفسه مضايق وعايز يعمل حاجة بس مش عارف

ودخلت الكلية وابتديت اسمع اكتر عن الحكاية دي بقى وبالتفصيل لغاية ما بقيت في سنة خامسة ، انا طبعا مش بكتب ده كله علشان اعرفكوا الحكاية لأن كلكوا عارفينها بس انا بكتب ده لأني بجد حاسس ان انا اللي بتهان وانا اللي بتعذب وانا اللي محتل

ابتديت بالمقاطعة الحمد لله وبالدعاء وبالتبرع على قد ما اقدر وابتديت اسمع كلام الناس من حواليا لقيت ان قضية فلسطين دي اخر حاجة ممكن يتكلموا فيها عارفين معنى ده ايه ؟؟؟؟

معنى ده ياسادة ان احنا منتظرين جيل قادم لا يعرف ما هي فلسطين ولا يعرف ما هو القدس !!!!

وكنت اتمنى اني اكون عايش في فترة الحروب اللي مرت بيها مصر صحيح هي فترة كانت صعبة وكلها مخاطر بس الواحد ساعتها كان على الاقل هيحس انه عاش لسبب او حتى مات لسبب بدل العيشة الهنية اللي احنا عايشنها دلوقتي ومنعرفش اخرها هيودينا لفين

معلش انا طولت عليكوا بس حسيت اني عايز افضفض

سلاام