31‏/12‏/2008

وكسرت ايديا يا عنيا

تحديث : النتيجة ظهرت الحمد لله وجبت جيد جدا


طبعا انا ابيت ان ينتهي العام القديم ويبدأ العام الجديد إلا
لما اكون عامل حاجة مميزة وبالفعل عملت حاجة مميزة جدا بس مؤلمة جدا ... انا اعلنها صريحة من موقعي هذا اني قد كسرت ايديا يا رجالة

انها حقا تجربة فريدة من نوعها منصحش اي حد انه يجربها وربنا يعافيكوا يارب ويحرسكوا قادر يا كريم ...آمين

تفاصيل التجربة بدأت في مساء يوم الثلاثاء الغابر لما كنت بألعب الساحرة المستديرة وكنت واقف حارس مرمى ولأني بحب اعمل كل حاجة باتقان وتفاني اتشاطت عليا كورة عادية جدا وبريئة جدا بس تقريبا سرعتها قاربت 150 كيلو متر في الساعة او على حسب كلام هيئة الارصاد الجوية كانت بمثابة صاروخ ارض ارض ولأني مكلف بحراسة اغلى حاجة في الساحرة المستديرة حطيت ايدي بس قدام الكورة ( آه والله يعني حتى محاولتش اصدها ) والحمد لله مدخلتش جوووووون وصحيح اتغلبنا الماتش بس اتغلبنا بكرامة وعزيمة ونفسية زملائي كانت في الارض تعاطفا معايا طبعا

المهم بعد ما حطيت ايدي قدام القذيفة مدرتش بنفسي يا اخواني الا وانا على الارض وطبعا بما اننا كلنا شباب في كلية طب وتقريبا بيفهموا في الطب كانت اول نصيحة ليا " مسبتهاش تدخل الجون ليه؟!!! " ، " قوم حط عليها مية ساقعة " ، " ابقى خلي الكورة تنفعك "

قلتلهم روحوني لماما انا عايز ماما وبالفعل روحوني لماما وعملت آشعة وجبستها لاني اكتشفت انها مكسورة وظهر الحق وخفق (زهق ) الباطل لأنهم اجمعوا انها مجزوعة وانا الوحيد اللي قلت انها مكسورة

نعم اخواني ... انها الفدائية في العمل ... انه التصميم والارادة ... وهيجي واحد يقلي طيب مسبتهاش تدخل ليه هرد عليه ببساطة واقله لأني مصري وابن مصري كان لازم افديها حتى اخر عظمة من عظام جسدي ( طبعا ده كله كلام هجس انا لو اعرف اني هتكسر كنت انا بنفسي دخلتها جون في نفسي ) بس قدر الله وما شاء فعل

اما عن الصعيد النفسي العميق فأنا باحمد ربنا وعارف اني احسن من ناس كتير الحمد لله وعرفت قيمة الدراع وقيمة كل حاجة ربنا خلقها ويارب يديمها علينا نعمة

اما عن الجبس فحدث ولا حرج :-
1- وزنه تقيل جدا خاصة في التنفس وحاسس ان كمان 3 ايام هميل بزاوية 30 درجة ناحية الشمال
2- عايز اهرش في دراعي ومش عارف وهموت واهرش بجد
3- هو شكله شيك الصراحة بس مؤلم قوي
4- بيخلي الواحد معاق من الآخر يعني

N.B:- انا كتبت البوست ده بإيد واحدة في حوالي نص ساعة ( حلو؟ )
N.B:- امانة الدعاء لاخوانا في غزة لان خلاص الواحد زهق من كتر الكلام
N.B:- اللي يعرف طريقة اهرش بيها ياريت يقلي لو سمحت

سلااام

هناك 36 تعليقًا:

Empress appy يقول...

طريقه مجربه مسطره ودخلها واهرش والف سلام عليك شوفت بقى فايده ان بنت هى اللى تقف جون يا ابنى انا كنت بقف جون محدش كان يقدر يجى ناحيتى هيجيب لنفسه مصيبه يعنى

و القادم....أجمل يقول...

الف سلامه
يلا عام سعيد
:D
إن شاء الله خير
بس أهم حاجة مجتش جون



















مسبتهاش تدخل ليه بس
:\
!!!!!!!!!!!!!!

AHMED SAMIR يقول...

انت عملت الصح
طول عمرك بطل
الانسان ايه غير مرمى وشوية حاجات فوق بعضها
لو كنت سبتها تدخل جول كنت خسرت نفسك ومبادئك انما بما انك صديتها بأيدك فالخسائر تهون امام الحفاظ على شباكك عذراء
الف سلامة

أية عفيفي يقول...

والله ماقادره امسك نفسى من الضحك من اسلوبك فى الكتابه


بس المره الجايه تبقى تسيب الكره تدخل جول احسن كده كده الماتش خسران يبقى مش دراعك والماتش:D

بس الف سلامه عليك


بس يعنى ايه N.B

موناليزا يقول...

الف سلامة عليك وطهور بإذن الله

غير معرف يقول...

السلام عليكم و رحمة الله و بركاته .

الصراحة مش عارفة اقول ايه ؟؟!!
الف سلامة عليك و الف لا باْس ...و هارد لك على الماتش .

لا لا لا اجمد يا بطل مش كدا...ربنا يتم شفاءك على خير .

كل عام و انت بخير ... يا رب عام جديد سعيد عليك ان شاء الله ... اعطاك الله ما تمنيت و اْجابك بما دعيت و رزقك ما رجوت .

سفروتة يقول...

الف سلامة عليك يا دوك
تعيش وتاخد غيرها
يعني كان لازم تلعب كورة في اليوم ده
يللا قدرك ونصيبك بقي
:))

ان شاء الله تخف وترجع حارس مرمي تصد احسن من الاول

وبعدين تعالي هنا
هو لازم تكتب في الاخر
N.B
لازم تفكرني بيها وتفكرني بكتب الكلية
اعااااااااااااااااااااااااااااا
شفت بقي ربنا بيخلص حقي وكسر ايدك

ـــــــــــ

كل سنة وانت طيب يا هيرو
ويارب تكون سنة سعيدة

دمت بكل خير
:)

Adham يقول...

لا بأس عليك يا جميل ..
طهور إن شاء الله :)

و القادم....أجمل يقول...

أخبار النتيجة إيه
؟؟؟؟؟؟!!!!!!!!!!
ربنا يوفقكم يارب

سفروتة يقول...

الف الف الف مليوووووووووووووووون مبروك يا دوك
طبعا هم وانزاااااااااااااح
والله كنت بدعيلك
اخيرا هتعيش الاجازة بهدوء شوية
عقبالنااااااااااااااااااا يارب
انا بس عايزة اخلص امتحانات.... والله هستريح جدا
ــــــــــــــــــ
بس انت ممكن تغير نظرتك للدكاترة ...تلاقيهم كانوا مستنيين السنة الجديدة عشان يعلنوا النتيجة
ناس بتفكر والله
:))

دمت بكل خير

غير معرف يقول...

السلام عليكم و رحمة الله و بركاته .

اْلف اْلف مبروك ... جميل جدا

مبروك عليك النتيجة و دائما ان شاء الله ... وعقبال السنة الجاية

ارق تحياتى ... سلاااام

غير معرف يقول...

ألف سلامة لحضرتك وألف مبرووووووووووك
شفاك الله وعافاك
والناجح يرفع ايده :)
___________________________
لا ننسى اخواننا من الدعاء والنصرة وربنا المستعان

Dr. Ibrahim يقول...

لا ألف سلامة يا دوك

مكنتش الكورة تتخرم يا ولاد قبل ما تصيبك

ربنا مع غزة وأهلها

احسن طريقة للهرش هات شوية رمل وحطه وعينك ماتشوف الا النور :)

بهرج طبعا اوعى تعمل كده

تحياتى

أية عفيفي يقول...

alf mabroouk

we 32bal el sana el gaya we bet2dir a7la kaman

we 32baly ana kaman amt7en we arta7 :S

fnoonh يقول...

على فكرة يا هيرو انت في روح فكاهة جميلة جدا جدا جدا في كتاباتك وحقيقي بتعجبني جدا
والف سلامة عليك وان شاء الله تعيش وتاخد غيرها ههههههههه
ومبروك على النتيجة وربنا يوفقك

و القادم....أجمل يقول...

يا ربنا لك الحمد
كما ينبغي لجلال وجهك
و عظيم سلطانك

مبروووووووووووك

بذرة امل يقول...

اولا : الف مبروك يا دكتور وخلاص هانت
ربنا يوفقكم
ثانيا : الف سلامة
ده مصير اللى بيحب الساحرة المستديرة
شفاك الله وعفاك

بذرة امل يقول...

حملة جمع التبرعات لغزة
الى كل مدونى الشرقية
ان شاء الله هنتقابل بكرة الاتنين 5/1
الساعة 12 ونص
فى نقابة المهن الطبية بالشرقية - كوبرى العبور
أكتر حاجات محتاجينها دلوقتى
الأدوية
ومحتاجين كمان تبرعات مادية
مستنينكم
بعد صلاة الظهر مباشرة
وان شاء الله هيكون فى ميعاد تانى خلال الاسبوع ده
هنزله على المدونة

FreeKiller يقول...

الف مبروك عالنتيجة
عقبال امتياز البكالوريوس بإذن الله

و الف سلامة
جرب المسطرة زي ما آبي قالت
و ابقى خد بالك و انت واقف جون بعد كده

بالتوفيق

ان بي:يرعتك بايد واحدة مش بطاله
الحمد لله على النعم و ربنا يكون مع فلسطين

Saied khorshid يقول...

الحمد لله حمداً كثيراً طيباً مباركاً فيه

اللهم صل و سلم و بارك على سيدنا محمد و على آله و صحبه و التابعين

اللهم إنا نسألك النصر لأهل الإسلام يا رب العالمين

اللهم ثبت أقدام المجاهدين وانصرهم على اليهود الغاصبين

اللهم إنا نسألك الفرج العاجل لإخواننا المحاصرين تحت القصف والحصار

اللهم فرج هم المهمومين في غزة وفك اسر المأسورين ونفس كرب المحصورين يا ارحم الراحمين

اللهم تقبلهم شهداء ...اللهم اشفي جرحاهم وثبت خطاهم وافرغ عليهم صبراً من عندك

اللهم أمين... اللهم أمين

و صل اللهم و سلم و بارك على سيدنا محمد و على آله و صحبه أجمعين

و الحمد لله رب العالمين

أضف دعاء لأهلنا فى غزة
وجزاكم الله خير

دعاء مواجهات يقول...

و الف الف الف مليون سلاامة عليك

والف الف الف الف الف مليااارب مبرووووووك

لولولولولولولولى

بيس

MARAM يقول...

الف سلامه على حضرتك دا اولا ثانيا كتابتك فيها نوع من المرح الجميل اوي

تقبل مروري

عاشــــــ النقاب ـقــــة"نونو" يقول...

اضحك الله سنك
والف سلامة عليك ولا باس طهور باذن الله
الف مبروك النجاح وعقبال التخرج
وانت في الشدة دي ادعي لاهل غزة
ربنا يفك عنهم وعنا يارب

غير معرف يقول...

السلام عليكم ورحمة الله و بركاته .

داخلة كدا بالصدفة ... لفت نظرى رقم اتغير ؟!... قلت يمكن تهيؤات ؟؟... رجعت اتاْكد تانى !!!!هههههههه ... طلع بحق و حقيقى !!!

كل سنة و اْنت طيب ... عيد ميلاد سعيد و سنة سعيدة عليك ان شاءالله.

* kol sana wenta tayeb *
* 3o2bal meet sana *
* Happy BirthDay *
* With My Best Wishes For All Dreams To Be True *

salam

HERO يقول...

د \ داليا :

ميرسي اوي وربنا يخليكي ويارب دايما منورة المدونة كده

عاشــــــ النقاب ـقــــة"نونو" يقول...

كل عام وانتم الى الرحمن اقرب
طيب طمنا على ايديك حتى مش عاوزين لا جاتوه ولا تورتة ولا شربات نجاح يا سيدي
والموز عندي

الفراشة الصغيرة يقول...

احتمال مسطرة تنفع
انك تهرش بيها

عموما الف سلامه
ومتبقاش تلعب مع الكورة تانى
مدام هى وحشه كده وبتكسر عظمك

Empress appy يقول...

مبروك يا بطل الف مبروك

dodda يقول...

1000 سلامه مع انى افتكر انك خلاص فكيت الجبس....

ولتل مش حقولك مسبتهاش تدخل ليه
انا حقولك اخر مره تلعب كوره
انت احرك اتارى
:)

غير معرف يقول...
أزال أحد مشرفي المدونة هذا التعليق.
Ghada , Rofayda يقول...

الف الف الف سلامه
وشفاك الله وعفاك يافندم
والف الف الف مبروك النتيجة

دمت بخير

تحيااااتي

Esseto Hanem يقول...

Allah ymaseek bel 5er wallahy ya (mshmsh) :D ana alabt el donia 3shan ala2y el blog bta3ak wel 7mdolelah weslt .. alf la ba2s ya fandem .. we rabena m3ako game3an :D ...
emdaaa2
3aberet sabeel men ayam maggalet zmssa :))

HERO يقول...

bonda :

الله يمسيكي بالخير انتي
يارب تكوني بخير وكويسة
والله يسلمك يا ستي الكلام ده كان من سنة
وادعيلنا بقى علشان احنا بنمتحن دلوقتي

غير معرف يقول...

وأخيرا ، حصلت على ما كنت أبحث عنه! أنا بالتأكيد تتمتع كل قليلا من ذلك. سعيد أنا تعثرت في هذه المادة! ابتسامة لقد قمت بحفظها للتحقق من الاشياء الجديدة التي ترسلها.

غير معرف يقول...

كيف إني أسألك لمزيد من التفاصيل؟ عظيم آخر في حاجة الى معرفة المزيد...

Unknown يقول...

thx

كشف تسربات المياة
غسيل خزانات
شركة نظافة عامة