انا قلت بقى ايه اخلص التاجات اللي عندي كلها واخلص منها علشان ابقى حر نفسي كده وميبقاش عليا ديون فقلت اعمل تاج كمان ... هو صحيح جه متأخر وده بسبب ان الكمبيوتر اتحرق الحمد لله ( بس طفيته وجبت واحد جديد ) والنت كمان كان مقطوع يعني لما بتبوظ بتبوظ مرة واحدة ... ما علينا التاج التاني اهو : هو طبعا جالي من صديق عمري ابو نصيف ( Dr.Nassef )
لوأعطيتك ثلاث وردات من هم الثلاث الأشخاص اللى هتهديهم الورد اللى معاك ؟؟
الاولى : لماما طبعا حبيبة قلبي فعلا الست دي مش عارف أوفيها حقها ازاي وبالرغم من اني مش باسمع كلامها في بعض الاحيان او في معظم الاحيان ( يعني مش باسمع كلامها خالص من الاخر يعني ) بس فعلا بحبها جدا جدا ومش عارف من غيرها كنت ممكن ابقى عايش ازاي
الثانية : اكيد يعني لبابا حبيبي انا بجد لما ابص للمستوى اللي بابا معيشنا فيه وطلباتنا اللي بيقضيها لينا انا واخواتي باحس بالحسرة طيب انا لما اتجوز مش هحصل 1\4 المستوى اللي انا عايش فيه علشان كده انا بفكر اصرف نظر عن الجواز واعد في بيت ابويا احسن معزز مكرم
الثالثة : لصاحب التاج طبعا محمد نصيف صديق عمري وهو من الشخصيات فعلا اللي الواحد يفخر انه مصاحبهم ولينا مع بعض صولات وجولات ومن ابرزها ( ال 200 كم ) اكيد فهمتني يا ابو نصيف وتتمسى بالخير
=====================================الثالثة : لصاحب التاج طبعا محمد نصيف صديق عمري وهو من الشخصيات فعلا اللي الواحد يفخر انه مصاحبهم ولينا مع بعض صولات وجولات ومن ابرزها ( ال 200 كم ) اكيد فهمتني يا ابو نصيف وتتمسى بالخير
لو أعطيتك ورقة بيها 3 سطور وقلت لك أكتب فيهم اللى أنت عيزه هتكتب إيه ؟؟
مش عارف بصراحة اكتب ايه بس عايز اكتب عن حالنا وده طبعا مش هيكفيه 3 سطور بس اجمالا انا نفسي البلد يتصلح حالها وترجع مصر بتاعة زمان وارجع افخر تاني اني مصري ومش افكر في يوم من الايام اني اسيبها واهاجر من كتر الغباء والتخلف اللي مليها واللي فعلا بقى يجيب الضغط والسكر والامراض المزمنة
=======================================ما هو هدفك فى الحياة ؟؟
والله زي اي حد له هدف اني اكون ناجح واحقق اللي باحلم بيه واعلم على التاريخ ( على رأي الدكتور ) واحاول يكون ليا بصمة في المجتمع بالخير طبعا واني اسعد بابا وماما واخواتي واكون دايما جنبهم لما يحتاجوني وحكاية دكتور دي معتقدش انها تفرق معايا
=======================================إن شاء الله بكرة هيكون أحسن من النهارده"ِهل تصدق هذه المقولة ؟؟ ولماذا ؟؟
والله هو المنطق والتاريخ وحتى الجبر والهندسة بيقولوا ان المفروض انها صح بس في اي حتة الا هنا وده طبعا من اللي شايفه بيحصل حواليا وفي كل مكان كل شئ يوحي بالتأخر وبالفشل مفيش اي حاجة تدي بريق امل لامع من بعيد تثبت عكس كده علشان كده انا مش مصدق المقولة دي بنسبة 74.84%
=======================================أجمل مقولة سمعتها فى حياتك ؟؟
" ان الرجل لا ينسى اول امرأة احبها والمرأة لا تنسى اول رجل خانها "
ومحدش يسألني ليه لأن ببساطة معرفش
من المغنى اللى بتحبه أوى و إيه أحلى أغنية ليه بتحبها ؟؟
عبد الحليم حافظ واحسن اغنية بحبهاله " موعود " وخاصة ايام الامتحانات
"غزة" تمثل لك إيه فى حياتك ؟؟
والله انا شايف انها قضية الوطن العربي بس على صغير
أعطى لإنتمائك لوطنك درجة من مائة ؟؟
بصراحة 80.06 %
لو تزوجت و أنجبت بنتين و ولدين أى الأسماء تختار لهم ؟؟
سؤال غريب لأني مش عارف الموضة اياميها هتبقى ايه بس ممكن اسمي
( معتز - معاذ - هاجر - سلمى )
غشيت فى أمتحان و انت صغير ؟؟
ايه الاحراج ده بصراحة آه بس قبل ثانوي وكان مريتين
لو أتعرض عليك رشوة كبيرة و انت فى زنقة ماليه هتعمل إيه ؟؟
مش هقبلها طبعا وربنا يثبت اقدامنا يا رب
قول 3 صفات ب 3 كلمات بس توصف بيهم شخصيتك ؟
(................ - ...................... - ..................... )complete
اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه؟
بابا : مصحف كبير
ماما : هخليها هي اللي تختار
اخواتي : هديهم حقهم ناشف
=======================================
ايه المجال اللى غير دراستك وشايف نفسك فيه قوي ؟
سباق السيارات
=======================================
بتحب السفر؟
جدا من احلى هوياتي
=======================================
طب دلوقتى حالا ايه المكان اللى نفسك تكون فيه ؟
فيينا
=======================================
تمرر التاج ده لمين ؟؟
فاتيما
appy
د\هيما
حكاوي القهاوي
ميرو
=-=-=-=-=-=-=-=-=-=-=-=-=-=-=-=-=-=-=-=-=-=-=
وبكده الحمد لله اكون خلصت ثاني تاج ليا وربنا يسهل هانت فاضل واحد كمان
سلااام
هناك 38 تعليقًا:
إجابات جميلة يا هيرو
ربنا يخلي الوالدة والوالد ، ونصيف ياخويا !!
مفيش حاجة لأخوك ؟ يللا مش مهم
---
ربنا يرزقك أحلامك
وتقدر تعلم ع التاريخ ..
يا معلم
:)
نفسى اعرف حضرتك بتحسب
النسب المئويه على طريق ايه ؟؟
80.06%
بنفكرنى بمجاميع الثانويه العامه
إجابات جميله
مبدع كالعادة يا معلم
بس عاوزك تبعتلى التاج ده ياااااااض
واضح انك مابقتش تخاف منى
هههههههههههه
جميله اجاباتك
بس ايه النقط الكتير الى عملتها دى
وحكايه النسبه المئويه اشمعنى السته من ميه يعنى:D
بجد جميل التاج وربنايخليك مامتك وباباك واخواتك
تحياتى
ههههههههههههههههههه
جامد التاج واجاباتك جامدة يا عم
بس مكنتش اعرف انك بتحب عبد الحليم
وسباق عربيات وحاجات جامدة ماشي يا عم
و الف شكر ع التاج..
ازيك هيرو ... اجاباتك بجد جميلة و الاجمل انتمائك و حبك الكبير لاسرتك اللى واضح من كلامك..وربنا بجد يبارك لكم فيهم و يخليهم و تسعدهم زى ما اسعدوك..انت مش جاوبت على سؤال وسبت مكانه نقط ؟؟!!.. ده علشان ايه ؟!..ممكن من اجاباتك اتوقع 3 كلمات << ذكى ..صريح ..جرىء>> ..تحياتى ليك ..سلام
جميل ...جميل والله
اجابات منطقيه وحلوه
بس حكاية دكتور مش فارقه معاك
ليه يابني كده بس ..امال تاعب نفسك ليه مش عشان تبقي دكتور
ربنا يكرمك كده وتبقي دكتور قد الدنيا ومشهور بقي وعيادات وعربيات
بس اما نبقي نيجي نسلم عليك اوعي تعمل نفسك مش فاكرنا حركات بقي
تقبل مروري
سلام
السلام عليكم
فعلا معاك اصعب حاجة ان الواحد يوصف نفسه
ربنا يخلي بابا ومماما واخواتك والبنوتة جارتكم اللي بتحبها
تقديري وتحياتي
خبيب :
والله شايلك لعوزة يا معلم
وعايز مساعدتك بقى علشان نعلم على التاريخ صح هههه
وشكرا لمرورك
===========================
ام حبيبة :
والله النسب دي طالعة بالالة الحاسبة يعني بالضبط هههههههه
وشكراعلى مرورك
مطرح ما ترسي دقلها :
ياباشا التاج وصاحب التاج تحت امرك احنا نقدر نرفضلك طلب
وبعدين مين المفروض يخاف من مين لمؤاخذة يعني ؟
=====================
ebtsama 7ayah :
النقط دي انا سايبها علشان انتوا تكملوها كنوع من التفكير يعني منا مش هحل كل حاجة لوحدي
والنسب طالعة بالضبط بالالة الحاسبة يعني مفيش فيها خطأ هههههههههه
mero :
الله يخليك يا باشا ده بس من ذوقك وانا فعلا باحب حليم والعربيات منت عارف بقى
ولا شكر على واجب
=====================
د\داليا :
بجد شكرا لذوقك واخجلتم تواضعنا انا فعلا كنت سايب الصفات دي علشان انتوا تكملوها بما يترآى لكم
وشكرا على الدعوة الجميلة دي ويارب دايما منوراني
يوميات فنانة مفروسة جدا :
اقلك دكتور مش فارقة ليه لأن للأسف انا مش حابب المادة دي بس طبعا لازم هحبها علشان اعمل فيها حاجة بس المشكلة بقى اني لسة مش حبيتها يعني الموضوع كبير كبييييير كبيييييير ودعواتك لينا
وطبعا انا لا يمكن انساكوا سواء دكتور او لا
وشكرا على مرورك
===========================
nonoymm :
الله يخليكي وفعلا شكرا على الدعوة الجميلة دي
ونورتي المدونة
ازيك يا بكاش؟؟؟
فيينا!!!!
ربنا ينولهالك
بدل ما تقول اروح احج؟؟؟؟؟؟؟
ربنا يرزقنا الحج والعمره
إيه دا ؟؟
أنا إسمى مكتوب ؟؟
طيييييب
بص بقى من الآخر إنت لسان حال كل الشباب اللى فى سنك
زعلان على حال البلد و حاله
يائس من أى بارقة أمل و بيفضل يتفرج ع الدنيا عشان موش قادر يعيشها
كان نفس فى مجال تانى غير مجاله لأن جاله إحباط من الواقع
أهله أهم ناس فى حياته عشان إبن حلال و أخلاق
عنده وعى مبكر بسبب الظروف الهباب اللى هاجمتنا صغار و كبار و شوية شوية موش هتسيب الأطفال و الجنين فى بطن امه ....
التاج دا تدبيسة جامدة قوى
مشكرين يا سيدى و على مهلى بقى لحسن الموضوع كبير قوى
انا اسمى مكتوووب
لااااااااااااااا
طايببببببببببببب
فعلا عجبنى الانتماء اوى
80.06 %
انت كنت جايب ايه ف الكيونتى ياعمده
واضح انك كنت مرتب فيها
الفايتل ريتس عامله معاك شغل
المرادى
اجابات ف المضمون ياعمده
dodda :
انا بكاش ؟؟!! مقبولة منك ماشي هههههه بس عرفتي منين ؟
وبعدين مهي كل الناس نفسها تحج بس انا قلت المكان اللي نفسي اكون فيه
وشكرا على مرورك
====================
فاتيما :
اه طبعا اسمك مكتوب اول واحد كمان يالا شدي حيلك في الاجابات بقى
وشكرا على التحليل انا مكنتش عارف انك ليكي في التحليل كمان
نورتي المدونة وسلامي ليوسف
د \ اجدع بنوتة :
والله معلش نسيت مش قصدي واعتبريه هدية مني يا ستي ومتزعليش انا قلت انك هتبقي مشغولة في الامتحانات ومش فاضية بس طالما عايزاه خديه ميغلاش عليكي
وللأسف جبت فيها جيد جدا 2 درجة عن امتياز والله بس كانت مادة بنت 60×70=4200
منورة دايما
أولا أعترف ان ده أكتر بوست أنا اتمسمرت فيه فى حياتى هههه(وردة - صديق عمرى) ده كتير والله , طبعا يا عمدة القلوب عند بعضها وربنا يعلم
وسبحان الله كل اللحظات المهمة فى حياتى كنت دايما موجود جنبى ربنا يديم الود و يجمعنا بالحب ده فى جنته ان شاء الله
أما بالنسبة للجواز و الكلام ده انا عندى فكرة أحنا نقضيها كده تاجات حب بين بعضينا وبلاها جواز طب بذمتك لو اتجوزت و بقى عندك عيال هيجيلك قلب لل 200 تانى هههه
طبعا لأ
أحبك الله الذى أحببتنى فيه
اراك على خير
:)
اجابات جميلة وشكلها والله اعلم صادقة.. ربنا يخلى لك مامتك و بابتك ولوك العبيط
dr.nassef :
والله ياباشا دي اقل حاجة ممكن نعملها وطبعا علشان ال 200 انا اضحي بأي حاجة
======================
انجي :
لا يا ختي اطمني الاجابات صادقة الحمد لله انتي عمرك هتشوفي نسب مئوية بالدقة دي هههههه
نورتي
ماشاء الله
عجبتنى اجاباتك اوى
جميل انك فاكر والدك ووالدت فى كل سؤال
وكويسه اوى نسبة انتماءك لبلدك :)
بالتوفيق يارب
عسسسسسسسسسسسسسسسسسسسسسسسسل
اجاباتك جميلة جدا
و طبعا باضم صوتي للباقيين في موضوع ال 80.06 %
ميرسي عالتاج
ان شاء الله احاول اجاوبه في اقرب فرصة
تحياتي
إيه يا عم هيرو انت هتقضيها تاجات
ولا إيه؟
د/هيما
no comment
عشان تستريح يا عم هيرو
بس ايه ياعم يبقى افتكرنا بتاج كده
اجابا جميلة مووووت
الله ينور يا هيرو
amal :
الله يخليكي ده بس من زوقك وطبعا مفيش حد يقدر ينسى باباه وماماته ونورتي المدونة
====================
الضاحك الباكي :
مش عارف ليه كل ما تحط تعليق احس انك لسة جاي من منحل نحل وعسل وحاجات من دي ههههههه وطبعا التاج ميغلاش عليك ياباشا
dr.herma :
منا قلت اخلص منهم مرة واحدة بقى علشان افضى
=============
واحد جاله الضغط :
محسسني دايما اني باضربك علشان تيجي تعلق وبعدين افتكرك بواحد ازاي طالما انت اصلا مش بتدخل في اي مودنة ؟؟
=======================
dr.pharma :
ياباشا ده نورك انت والله ومنور المدونة
اجابات جميلة اوى
وبتعرفنا بيك اكتر
بس حلوة هقعد جمب ابويا ف البيت دى
تصدق احسن بردوو
تحياتى لصدقك
بيس
بس انا زعلانة من ال80 ف المية دوول
اشطه الاجابات يا برنس ..
مبروك عليك التاج ..
جالى بردو نفس التاج ده ومش عارف خجاوبه ازاى ..
ربنا يسهل بقى ..
تحياتى ..
أسامة أمين
كل تاج وانت طيب
اجابات بسيطة لكن مفيدة
تحياتى
بجد بجد بجد ربنا يحميك ويخليلك ماما وبابا واخواتك ويديك اللى انت عايزه وتقدر تكون زى بابا واحسن كمانوتفضل معاهم كده على طول
كالعادة....متحدث مفوه على الرغم من انك دايما بتزعم عكس كده...
ربنا يحقق كل احلامك....
ربنا يسعدك في الدنيا وفي الاخره
تحيااااااتي....
دعاء مواجهات :
بذمتك مش فكرة حلوة وسيبك بقى من الجواز والشغل والحاجات دي
وبالنسبة لنسبة الانتماء انا مقدم على امتحان تحسين يمكن اعلى شوية
========================
شمو نشادر :
الله يبارك فيك يابني ده سهل جدا هتعد تحله في ربع ساعة بس وعليه 100 درجة مش كتير يعني نورت المدونة
tamer nabil :
نورت المدونة واتمنى تكرر الزيارة وشكرا على ذوقك
=================
غير معرف :
بتهيألي سمعت الصوت ده قبل كده
===================
ghada&rofida :
انا بجد متشكر على الدعوة الحلوة دي والله ونورتي المدونة
أيه الحلاوة دى
يا هيرو باشا
مبدع يابنى
حلو قوى يا هيرو التاج ده هههههههههههههه
خصوصا التلت كلمات اللى بتصف فيهم شخصيتك
ههههههههههه
بوست جميل اتمنى تنورنى
هو كله تمام
ما عدا ال
80.06
لا بجد اشمعني
:D
hosam :
يابني ده بس من ذوقك والله منورني دايما
===================
كاتب مصري :
ويكون ليا الشرف يا فندم
=======================
بنت مصرية :
شكرا على ذوقك وعلى النور اللي في المدونة
========================
سنووايت :
والله هي طالعة بالالة الحاسبة كده اعمل ايه ؟؟ انا اكيد مش هفهم احسن منها هههههههه منوراني
إرسال تعليق