في ال 3 شهور الاخرنيين طول ما أنا ماشي مع حد من صحابي يقلي نزلت امبارح حتة مقال على المدونة والثاني يقلي شفت المدونة بتاعتي ؟ والثالث يقلي نزلت الصورة الفلانية على المدونة والرابع يقلي قريت على المدونة ( فعلا زهقت من المدونة )
المهم واحد من صحابي الاعزاء قالي متعملك مدونة
فقلتله ياسلاااام يا خويا وابقى عامل زيكوا كل يوم اصحى بالمدونة وانام بالمدونة واحلم بالمدونة
فقالي طيب جرب ولو مش عجبتك سيبك منها
فقلتله طيب ايه هي بقى فكرة المدونة اللي قرفاني دي ؟
فقالي دي عبارة عن صفحة ليك على النت بتكتب فيها اللي انت عايزه واي حاجة تيجي على بالك
فقلتله بس انا مليش في الكتابة ولا الشعر
قالي يا عم مش لازم مقالات وشعر وقصايد اكتب بس اي حاجة تيجي على بالك
بيني وبينكوا الفكرة دخلت دماغي فقلتله خلاص هبقى اشوف الموضوع ده بعدين
لغاية ما جه اليوم ده اللي هو النهاردة وقلت اجرب اعمل المدونة واشوف كده ايه حكايتها
وفعلا عملت المدونة وكتبتلكوا القصة دي لأن دي اللي جت على بالي ساعتها ( زي ما صاحبي قالي اكتب اللي يجي على بالك )
واشوفكوا قريب لما تيجي حاجة تانية على بالي
سلااام
