25‏/04‏/2008

عريس وعروسة

أنا الحمد لله زفيت ما يقرب من حوالي 30 عروسة وعريس ( عقبالكوا ) ما بين خطوبة ودخلة وكتب كتاب في العربية حبيبتي المرسيدس طبعا والمرة دي هحكيلكوا عن مواقف لذيذة كانت بتحصل اثناء الزفات آخرها كان من اسبوعين

الموقف الاول :

كان فرح المحروس ابن عمتي وكان جايب عروسته من سفر والمفروض اني اقابلهم في مدخل الزقازيق علشان نبدأ الزفة ونوصلهم للقاعة وما إلى ذلك ، المهم الساعة كانت 8 مساء وبالفعل بدئنا الزفة وراحت العروسة لبيت عمتي علشان تصلح ال make up بتاعها على الماشي كده ونفاجأ بعد وصولنا لبيت عمتي إن مفيش حد في البيت والمفتاح بتاع الشقة مع ابن عمتي التاني والموبايل بتاعه مقفول

المهم جه المحروس بعديها بنص ساعة والعروسة صلحت ال make up بتاعها وكله تمام والساعة بقت 9 وهنبدأ على بركة الله وعملنا الزفة الحمد لله ووصل العريس والعروسة للقاعة واحتفلوا وكان كله تمام وخلاص الساعة بقت 12 بليل وباستعد بقى علشان اروح اوصلهم لعش الزوجية المهم ركب العريس والعروسة ولقيت ابن عمتي

بيقلي :- يالا بقى يا محمد هنتصور فين ؟؟؟

فبصتله بصة غريبة كده مش عارف اوصفها وقلتله :- أفندم ؟؟!!!! تتصور فين ؟؟؟؟ هو انت لسة متصورتش ؟؟؟

فقالي :- لأ لسة

انا طبعا مسكت نفسي بالعافية ولفينا الزقازيق كلها حتة حتة لغاية ما لقينا استوديو فاتح ( الساعة 1 الفجر ) واتصوروا وروحوا البيت الساعة 2 الفجر وكانت دي اغرب زفة في حياتي التصوير بعد الفرح ( سبحان الله )

الموقف التاني :

كنت بازف مرة ولقيت العروسة فجأة كده بتقلي :- انا عايزة اطلع كوبري يا محمد ..... طيب بالله عليكوا لو انتوا مكاني تعملوا ايه ؟؟!!

المهم طلعتها كوبري وبعد ما نزلنا من على الكوبري قالتلي :- عايزة اطلع الكوبري التاني كمان يا محمد ( اصل الزقازيق فيها 2 كوبري بس )

( الصبر يا رب) المهم طلعتها الكوبري التاني وبعد ما نزلنا قالتلي :- لف واطلعهم تاني بقى يا محمد

قلتلها :- انتي طالق بالتلاتة

الموقف الثالث :

في زفة من الزفات لقيت بقى المرة دي العريس ( واحد صاحب بابي ) بيقلي :- محمد لف بينا على قد ما تقدر ( كانت دخلة )

فقلتله :- ليه خير ؟؟

قالي :- اصل مش ليا نفس اروح دلوقتي

قلتله :- هو انت لسة بدأت يا انكل اصلا علشان ما يبقاش ليك نفس ؟!

قالي :- لف بينا بس يا محمد وبلاش احراج ( بتهيألي كان بيهزر )

قلتله :- ماشي انت تأمر يا انكل

وفضلت الف والف والف لغاية ما البنزين خلص ودخلت البنزينة علشان احط بنزين ( عمركوا شفتوا عربية عروسة وعريس بتحط بنزين ) وروحتهم يوميها الساعة 3 الفجر ( مكنش بيهزر ) ومش عارف ايه اللي حصل بعد كده ومش عايز اعرف


دي اكتر المواقف اللي انا فاكرها وحصل حاجات تانية كتير بس مش جاية على بالي دلوقتي

وطبعا بأقول لكل اللي لسة ما اتجوزوش عقبالكوا جميعا وانا اولكوا وطبعا أنا تحت الامر في أي زفة وهسيب رقم تلفوني في الكونترول


سلااام

هناك 16 تعليقًا:

د/اجدع بنوته يقول...

جامده اوى عربية عروسه وعريس

تدخل تفوول دى هههههههههههههههههه

لف بينا ع قد متقدر يامحمد

اطلع بينا كوبرى يامحمد

روح يامحمد ربنا يكون ف عونك يامحمد

وعؤبالك يامحمد

واحد جاله الضغط يقول...

ههههههههههه جامد يا محمد

حاسس بيك يبنى
منا كل ممشى فى الشارع يوم خميس أو جمعة ألاقيك يا رايح يا راجع ومعاك عروسة زى القمر

بتجيبهم منين ياض

عالعموم تعيش وتجوز

khobayb يقول...

ههههههههههههههههههههههه

روووووووووعة كالعادة

---

خدت حق البنزين طيب ولا ايه ؟

أم حبيبه يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

مواقف جامده مووووووووووت


ربنا يعينك يا محمد و تزف الزقاويق كلها


انا شوف واحده بقى تتصور قبل و بعد مش عارفه ليه

هههههههههههههه بجد مش قادره ابطل ضحك

M.Nassif يقول...

ههههههه
مش معقول
ايه الحالات الغريبة دى؟
عموما يا باشا ان شاء الله لو زفتنى اضمنلك قبل 10 نكون مروحين ههههه
;)

Empress appy يقول...

ٍؤال مش خبيث خالص
انت بتشتغل كده يعنى بتزف ههههههههههخخخخخخخخ
اناعارفه الزقازيق بعدى عليها كتير جدا
وبشوف الاتنين كوبرى بس دول مش كوبرى ولا انت تقصد انهى انا اقصد اللى وانا رايحه القاهرة
بجد وانا اول مرة اشوف عروسه بتتصور بعد الفرح والرقص والحركات زمان الميك اب ضاع
ههههههههه
عقبالك بجد وانا هزفك بنفسى بس قولى
وهطلعك كل الكبارى اللى فى الدنيا خخخخخخخخخ

HERO يقول...

د \ اجدع بنوتة

والله الواحد ساعتها بيبقى فرحان وحاسس انه بيقدم خدمة للانسانية وعقبالك انتي الاول وازفك ان شاء الله انا لسة المشوار قدامي طويييل



واحد جاله ضغط

هي العروسة زي القمر لأني بروح اقف قدام الكوافير وانقي العرسان قبل ما يركبوا معايا


خبيب

بنزين ايه يا عم صلي على النبي


ام حبيبة

وانا فرحان اني ضحكتك الحمد لله ابقي ادعيلي بقى


appy

بصي انتي تقدري تقولي دي شغلتي بعد الضهر

والكوبريين موجودين داخل مدينة الزقازيق مش على الطريق وان شاء الله لما اجي اتجوز هبقى اقلك علشان تزفيني

موناليزا يقول...

ربنا يقدرك على خدمة الناس ومشاركتهم فرحتهم واضفاء البسمة على وجوههم
بس هو فى الموقف التانى من اللى قال للعروسة انتى طالق لو العريس يبقى مش رومانسى خالص ولو انت يبقى الطلقة ماتحسبش ههههه

HERO يقول...

الله يخليكي وفعلا بيبقى شعور جميل لما تشوفيهم وهما فرحانيين

وانا اللي قلتلها انتي طالق بس بهزار طبعا

xezo يقول...

ياسيدي كله بثوابه

ويابخت من زف راسين في الحلال

سلوى يقول...

هههههه
والله كلها مواقف غريبه

حد يتصور بعد الفرح

وكمان اللي عايزة تطلع الكوبري ده

أحلى حاجه إنك بتشارك الناس دي فرحتها

ربنا يوفقك

غير معرف يقول...

جامدة جدااااااااااا

مش قادر امسك نفسي

امسكوها معايا

لف بينا يامحمد ... لف بينا يامحمد

بجد انا لو مكانك يمكن كنت نزلتهم من العربية

و العسل التاني اللي افتكر يتصور ...... ربنا يحرصة

كويس انه افتكر يتجوز

انا باعتلك تاج علي فكرة.

سلالالالالالام

Bongo يقول...

ربنا يقويك علي اللي بتشوفه ده كله :D

و عقبالك :)

اول زيارة لمدونتك

تحياتي

بالتوفيق

mohamed يقول...

عقبالك لما تتجوز واللى يزفك يشردك ع النت زى مانت عملت فيهم الا صحيح بتاعة الكبارىدى بترخم عليك كده وانت جاى تجامل امال عملت ايه فى المحروس جوزها ربنا يعينه

غير معرف يقول...

هههههههههههههههههههههههه
بقالى كتير متضحكتش كده مش حاقولك الله يكون فى عونك يا محمد ومش عارفه انت زاى بتفكر تزف حد تانى اذا كان دول الى انت فاكرهم بس

نونو يقول...

العروسة براحتها طبعا تعمل اللى هى عايزاة
لف بينا يا محمد عادى